Wan şaristano pîl o diyîn ê Vakurê Kurdîstanî yo ke hetê dewleta tirke ra tim binê tedaya leşkerî û sîyasî de yo. Wan de AKP her weçînayîş de bin keweno. Şarê herême tim HDP û partîyê kurdan weçînayî. Weçînayîşê herêmî yê 2014î de DBPyî zaf şaredarîyî vistî destî. Hukmatê AKPyî bi rayîrê qeyûman dest na şaredarîyanê DBPyî ser û pêro şaredarîyê HDPyî zî yê ke weçînayîşê 2019î de 10 şaredarîyî vistî destî bi rayîrê qeyûman dest na ser.

HDPyî weçînayîşê herêmî yê 31ê adare de Şaredarîya Şaristanê Pîlî ya Wanî de bi reyanê se ra 53 şaredarîya Qelqelîye de se ra 75, şaredarîya Rêya Armûşî de se ra 54, Şaredarîya Bêgirî de se ra 42, şaredarîya Ebexî de se ra 53, Şaredarîya Tûşba de se ra 52, Şaredarîya Atemêtanî de se ra 53, Şaredarîya Sarayî de se ra 61, Şaredarîya Elbakî de zî se ra 71 yê rayan vistî dest. AKPyî pêro şaredarîyê HDPyî vistî destî û karmendê xo ci rê kerdî qeyûm. Hemşaredarî zî kerdî esîr.

Şaristanê ke Keyfê Erdoganî Pê Nêno

AKP û serekê ci Erdoganî cayê ke weçînayîşê 31ê adare de nêvistî destî weçînayîşan ra dima bi xespkerdişê îradeyê şarî girewtî. Dima ke şarê Wanî reyna HDP weçîna serekê AKPyî 19ê tebaxe de dest na pêro şaredarîyê Amedî û Şaredarîya Mêrdînî, Şaredarîya Wanî ser. Dima ke Şaredarîya Wanî rê qeyûm ame tayînkerdene bi desan xebatkarê şaredarîye karê xo ra ameyî dûrvistene û surgunkerdene . Qeyûmî kasaya şaredarîye wextêkê kilmî de kerde venge û tede pere nêverda ke meaşê xebatkarê şaredarîyê bêrê dayene.

Hukmatê AKPyî 15ê teşrîna verêne de Şaredarîya Erdîşî rê qeyûm tayîn kerd û Hemşaredara Erdîşî Yildize Çetîn tepişte. Çetîne 11ê kanûne de Zîndanê Wanî rê surgunê Zîndanê Osmanîye bîye. Qezaya Erdîşî ya ke erdlerzeyê 2011î de raşaya dima ke weçînayîşê 2014î de DBP ser kewt newe ra amebî xo ser. 2016î de qeyûm Şaredarîya Erdîşî rê ame tayînkerdene û seke Erdîş newe ra erdlerze de raşaya. Qeyûmê Erdîşî serranê 2016 û 2019î de estbîyayîşê Şaredarîyê Erdîşî pêşkêşê AKPyî kerd. Şarê Erdîşî weçînayîşê 31ê adare de HDP weçîna û HDPyî wextêkê kilmî de Erdîş newe ra awan kerd. 15ê teşrîna verêne de newe ra Şaredarîya Erdîşî rê qeyûm ame tayînkerdene.

Şaredarîya Rêya Armûşî ya HDPyî 8ê teşrîna peyêne de dest nayîye ser. Hemşaredarê Rêya Armûşî zî ameyî destbendkerdene û tepiştene. Hemşaredar Azîm Yalcan Zîndanê Wanî rê surgunê Zindanê Erziromî ame kerdene. Şaredarîya Rêya Armûşî bi xizmetanê xo yê seba Rêya Armûşî vengê xo da eşnawitene.

Qezaya Sarayî serra 2014î de DBP û serra 2019î de zî HDPyî weçîna. Labelê 2ê teşrîna peyêne de AKP dest na ser. Hemşaredara Cazîye Dûman zî ameye tepiştene.

AKPyî dimayê weçînayîşê 31ê adare de bi destsernayîşê qezayanê Tûşba, Artemêtan û Ebexe dest pêkerd. HDPyî Tûşba de se ra 53 rayî girewtî. Hemşaredarê Tûşba Yilmaz Berkî bi bahaneyo ke qerarnameyê hukmê kanûnan de wezîfe ra amebi dûrvistene AKPyî dest na mazabataya ci ser. Herinda şaredarê HDPyî yê Tûşba de Salîh Akmano AKPyîj ame cadayene.

Qezaya Artemêtan a Wanî de weçînayîşê herêmî yê 31ê adare den HDPyî se ra 54 rayî girewtî. AKPyî bi bahaneya qerarnameyê hukmê qanûnan de Hemşaredara Artemêtanî Gulçane Kaçmaz Sayyîgît wezîfe ra girewt û herinda ci de namzetê xo yê Artemêtanî Îsmaîl Say sey qeyûm tayînê Artemêtanî kerd.

Çarenusê Şaredarîya Ebexî ya HDPyî zî sey şaredarîyanê Tûşba û Artemêtanî bi. HDPyî weçînayîşê herêmî yê 31ê adare de qezaya Ebexî de se ra 53 reyî girewtî. Bi bahaneya qerarnameyê hukmê qanûnan de mazbataya Hemşaredara Ebexî ya HDPyî Leyla Balkan ameye xespkerdene.