Newroza 2025î Herêmanê Pawitişî yê Medya bi merasîmêkê biheybetî  û coşê pîlî ameye fîrazkerdene. Fermandaranê Merkezê Qerargahî yê PKKyî ra Amed Malazgîrtî ke merasîm de qisey kerd, derheqê prosesê neweyî de mesajê muhîmî dayî.

Amed Malazgîrtî Newroze pîroz kerd, PKK sey partîya Newroze name kerd û nê vatî: ''PKK verî sey hêzê çekdarî vejîya werte. Vera polîtîkayanê înkar û îmhayî yê dewleta tirke têkoşîno xurt da. PKK 1990 de resa tîtikê hêzê xo û dewleta tirke semedê çareserîya sîyasîyî mecbur kerd. Bi mabênkarîya tay kesan çareserîya sîyasîyî kewt rojdem. Rayber Apoyî 1993 de adirbirnayîşo verên kerd û çîyê ke ewro vano o wext zî vatî. La dewleta tirke bi hêrişan cewab da û 1994 de pêkewtişê giranî qewimîyayî.

1998 de dewleta tirke Rayber Apoyî rê mektub şawit û waşt wa meseleya bi metodanê sîyasîyan bêra çareserkerdene. Rayber Apoyî reyna gamê adirbirnayîşî eştî la 1999 Rayber Apo bi komployî ame esîrgirewtene. Rixmê nê Rayber Apoyî seba ke dişmenîya kurdan û tirkan biqedîno tim gamê haştîye eştî. Hêzê gerîlayan sey grûban peyser ancîyayî. La dewleta tirke o wext zî metodê xapînayîş şuxulnayî. Bi seyan embazê ma yê ke peyser agêrayêne şehîd bîyî. Rixmê nê PKK û Rayber Apoyî seba ke qerarê înan ser bikewo proses nêxeripna û dest pê şerî nêkerd; dewleta tirke her wext bi komployan cewab da Rayber Apoyî.

Pêvînayîşanê 2013yî de eynî çî bi. 2015î ra nata mabênê ma û dewleta tirke de şero giran est o. Nê des serran de dewleta tirke bi xo zehîf bîye. PKKyî bedelê girdî dayî la ma ser kewtî.''

Amed Malazgîrtî ard ziwan ke înan seke badê vengdayîşê 27ê sibate adirbirnayîş îlan kerd, o wextî ra nata vera dewleta tirke çalakîyê plankerdeyî nêkerdî û vat vera nê hêrişê dewleta tirke dahîna zêdîyayî.

Malazgîrtî gerîlayan ra vat ê sey hêzê leşkerî gerek dîqet bikerê û nê vatî: ''Rayber Apoyî cewabê vengdayîşê Bahçelîyî da. Ma Bahçelîyî ra persenê; şima kam yew game eştê? Ma vînenê ke nîyetê dewleta tirke xirab o. Gerek ma sey hêzê gerîlayan dîqet bikerê. Çunke badê adirbirnayîşî hêrişê dewleta tirke dahîna zêdîyayî. Vatiş û munaqeşeyê dewleta tirke nê vatişê Rayber Apoyî ma eleqedar kenê. Ma Rayber Apoyî esas genê. Ma goştarîya Rayber Apoyî kenê. Rayber Apoyî no têgêrayîş afirna, têna o eşkeno qerarê ronayîşê çekan bido.

Dewleta tirke xo zaf biaqil hesibnena, tarîx dana ma! Vana wa PKK xo fes bikero.  Tewirê dewleta tirke yê vera ma qet nêbedilya. Kobanê de yew keyeyî ra 9 kesî qetil kerdî ke eleqeya ci bi çekan çîn o. Şarê kurdî nê perûne erjneno û vano binê nê qirkerdişan de mabênê ma û dewleta tirke de wayûbiratîye senî bena.

Bi qala kilme ma dewleta tirke û gamanê ci nizdî ra teqîp kenê. Ma do çirey sist mebê û cewabê Rayber Apoyî bipawê. Eke dewleta tirke samîya wa gamanê samîmîyan bierzo.Ma bê Rayber Apoyî çîyêk nêkenê. Gerek verî şertê Rayber Apoyî bêrê bedilnayene. Zaf mîlîtanê fedayîyî îkna nêbîyî. Ma zî tay xususan de îkna nêbîyî, şar zî hema îkna nêbîyo. Têna Rayber Apo eşkeno ma îkna bikero û semedê nê zî gerek Rayber Apo fîzîkî azad bo. Heta ke Rayber Apo bibo azad şarê kurdî do têkoşînê xo bidomno.

Awaze Çîya konser da

Şayîye de Awaze Çîye konser da. Gerîlayî bi slogananê “Bi can, bi xwîn em bi te re ne ey Serok!”  govenda azadîye girewte. Gerîlayanê ke heta saetanê ereyî yê şewe dormeyê adirê Newroze govende girewt Newroza 2025î bi heyecan, coş û moralê pîlî fîraz kerd.

Mîlîtananê azadîye ke şayîye de fîkrê xo vatî, bale ante mesajanê Rayber Apoyî ser û vat waştişê înan o bingeyî azadîya fîzîkîye ya Rayber Apoyî ya û heta ke o azad nêbo têkoşînê înan do dewam bikero.