Gerîlayanê HPG û YJA Starî şehîdê 18'ê Gulane yad kerdî û ard ziwan, şehîdanê menga Gulane xo seba azadîya şaranê bindestan xo feda kerd. Gerîlayan vat, “Şehîdanê menga Gulane bi bedenê xo meşaleya azadîye wekerde.”
Gerîlayanê HPG û YJA Starî bi wesîleya şehîdanê 18'ê Gulane ANF'yî rê qisey kerd û ard ziwan, şehîdê menga Gulane yê ke kodroyê rayberîyê têkoşînî yê, seba têkoşînê ewroyî paradîgmayêk kerdo werte.
Gerîlaya YJA Starê Axîn Zana ard ziwan, xeylê hemrayê înan ê bi fedayîye Têgêrayîşê Azadîye yê Kurdan rê serkêşîye kerda û mîyanê menga Gulane de şehîd bîyê û vat, “Şehîd Mizgîne, Mehmet Karasûngûr, Hakî Karer, Ferhat Kûrtay, Necmî Oner û bi hezaran hemrayê ma menga Gulane de şehîd kewtî. Ewro ke PKK resto no duşt, nuqtaya tewr muhîme, ruhê fedayî û têkoşînê nê hemrayanê ma bi.
Eke ma ewro eşkenê asan bîhne bigêrê û biciwîyê, no bi saya fedayî û têkoşînê şehîdanê menga Gulane yo. Seba wexto ke hêrişê giran ê faşîzmî ameyêne kerdene, bi îradeyê xo yê poladî, bi bawerîya serkewtişî û bi girêdayîşê cuya azade û Rayberîye têkoşînê ma serê bingeyê xurtî ra awan kerd û kerd ke merdimîye rê serkêşîyê bikero. Ma; gerîlayê HPG û YJA Starî ma reyna soz danê ke ma do têkoşînê înan ser bikerê.”
Şima nêeşkayî çaran bin bikerê, şima do nêeşkenê ma bin bikerê
Gerîlayê HPG'yî Zafer Tolhildanî da zanayene, seba her şorişgêrî anorêko gird o ke bibo hemrayê şorişgêrîya sey Hakî Karerî û ard ziwan, şehîdanê menga Gulane teyna seba têkoşîmê azadîye yê Kurdan ney, seba azadîya heme şaranê bindestan cuya xo feda kerda û vat, “Xoverdayîşê ewroyî bi ruhê xoverdayîşî yê serranê 1980’î dewam keno. Xoverdayîşo ke bi serkêşîya Leyla Guvene dest pêkerd, mîrasê tarîxê ma yê zîndanan xo rê esas girewt, gird bi û dinya ra vila bi. Peyamo ke zîndanan ra vejîya wina yo; ‘Şima nêeşkayî çaran bin bikerê, şima do nêeşkenê ma bin bikerê’. Şehîd Mizgîne zî bi vinetişê xo, milîtanî û hunerê xo seba ma, seba şarê ma bîye peymeye.”
Hevalê ma yê şehîdî bi bedenê xo meşaleya azadîye wekerde
Gerîlayê HPG'yî Denîz Garzanî da zanayene, 18'ê Gulane û menga Gulane seba têgêrayîşê înan mengêka muhûm a û vat, “Bi saya têkoşînê nê hevalan partîya ma hemleyêka girde eşte û wayîrê bingeyêkê xurtî yo ke tu cara nêrijîno bîye. Seba vîrardişê înan bi mîlyonan merdimî dorê PKK’yî de têkoşîn kenê
Hevalê ma yê şehîdî bi bedenê xo meşaleya azadîye eke wenêkerdêne, eke bedenê xo seba partîya ma nêkerdêne mertal, nika têkoşînêko bi nê hawayî xurt nêbîyêne. Naye ra rûmetê manewî seba ma vernîya her çîyî de yê.”
