Qezaya Cizîrî ya Şirnexî de mabênê serranê 2015î û 2016î de qedexeyê vejîyayîşê teberî ame îlan kerdene û qedexe 79 rojan dewam kerd. 7ê sibata 2016î de bi desan kesî erdzemînê bînaya Cizîrî de ameyî vêşnayene û qetilkerdene. Şehîdê Cizîrî serrgêra 4. de ameyî yadkerdene.

Bi nê armancîRêxistina Cizîrî ya HDPyî eşkerayîyêka çapemenîye kerde. Merasîmê yadkerdişî verê bînaya HDPyî ya qeza de ame kerdene û wekîlê HDPyî yê Şirnexî Nurane Îmîr û Huseyîn Kaçmaz, wekîlo verên ê HDPyî yê Şirnexî Ferhat Encu, endamê Têgêrayîşê Cinîyan ê Azadan (TJA), Rêxistina HDPyî ya Cizîrî û zaf kesî tewrê merasîmî bîyî. Hemserekê HDPyî yê Cizîrî Uzeyîr Kilinçî eşkerayîye wende. 

Uzeyîrî vist vîrî ke qirkerdişê Cizîrî ra 4 serrî vîyartî û wextê qedexeyan de nêzdîyê 300 kesan ameyî qetilkerdene.

Uzeyîrî vat: ''Xebitnayîşê çekanê giranan ra o çax taxanê Yafes, Sûrî, Cûdîyî û Nûrê de 3 hezar keyeyî zerar dî. Wextê qedexeyê vejîyayîşê teberî de heqê merdimî û heqê cuye ameyî binpaykerdene. 

Îqtîdarê AKPyî sey Qirkerdişê Roboskî xîret kerd ke Qirkerdişê Cizîrî bêro vîrkerdene. Prosesê huqûqî de û cigêrayîşê qirkerdişî de gamêke nêameye eştene û dewayê qirkerdişî nêameyî teqîbkerdene. Kiştoxê nê qirkerdişî yenê pawitene. Mesuldarê nê qirkerdişî îqtîdarê AKPyî yo. Heta ke kiştoxî bêrê cezakerdene ma peyê na mesele de yê. Mesuldarî do bêrê cezakerdene.''