Taxa Kayalarî ya qezaya Şemrexî ya Mêrdînî de keyeyê Turî de vizêr şan şewat vejîya. Cîrananê keyeyê Turî xebere daye îtfaîyayan û ekîbê îtfaîyayan şewat hewna kerd. 

Dima ke îtfaîyayî dekewtî keyeyî înan eşkera kerd ke  keyeyê Turî ra dadîye Nîsane Tur (34), domanî Mîran, Lorîne û Ecrîne yê ke serranê înan mabênê 1 û 7 de yê dûyê şewatî ra jehrî kewtî û merdî.

Cenazeyê dadîye û domanan ameyî berdene bi morgê Nêweşxaneyê Dewlete yê Mêrdînî. Ama zanayene ke cenazeyî seba otopsîyî do bêrê erşawitene Amedî û dima Mêrdîn de do bêrê definkerdene. 

 Ame parekerdene ke şanê şewatî babî Yunus Tur seba ke kargeh de xebitîyayêne keye de nêbi.