Çarçewa tebdîranê vera vîrusê Korona Şengal de vejîyayîşê teberî qedexe yo. Îdareyê Xoserî yê Şengalî bire daye ke wextê qedexeyê vejîyayîşê teberî heta 1ê nîsane dewam bikero û venha roniştoxan da ke goreyê tebdîran têbigêrê.
Îdareyê Xoserî yê Şengalî sey tebdîrê vera Korona 16ê adare ra heta 26ê adare vejîyayîşê teberî qedexe kerdbi. Îdareyê Xoserî reyna eşkerayîyêke weşanaye û wextê qedexeyê vejîyayîşê teberî derg kerd.
Destpêkê eşkerayîye de şengalijan rê sipas ame kerdene ke goreyê tebdîran têgêrayî. Eşkerayîye de ame vîrvistene ke Şengal heta nika na nêweşîye ra pakî ya û ame vatene: ''Her ke şino na nêweşîye zêdîyena, zehmetêr bena. Heta nika seba ci dermanêk nêame peydakerdene. Têna xopawitiş çareserîya nê vîrusî yo.''
Îdareyî venga şarê Şengalî da ke zêdêr hîşyar bibo, xo bipawo, rewşêka lezabeze nêba keyeyî ra nêvejîyo. Îdareyê Xoserî hîşyar kerd ke eke nêweşîye biresa Şengal rewşêka bitehluke virazîyena û vat: ''Îmkanê weşîye yê Şengalî kêm ê. Seba ke ma nêkewê zor û zehmetîyan, xopawitiş dermanêko tewr rast o.''
Eşkerayîye de ame waştene ke ganî şayî û dawetî bêrê vindertene, kombîyayîşê pîlî nêrê kerdene. Îdareyê Xoserî eşkera kerd ke wextê qedexeyê vejîyayîşê teberî heta 1ê nîsane ame dergkerdene.
