Vizêr verê Baxê Giştî yê Silêmanî de bi beşdarîya rêxistinanê komelê sivîlî, temsîlkaranê partîyan ê sîyasîyan û roniştoxanê Silêmanî vera xîretê şerê zereyî çalakîyêke ameye kerdene. Çalakîkeran pankarta bi nuşteyê 'Heta key birakujî?' akerde.

Çalakîye de Endamê Heyetê Averberdişê Konferansê Niştimanî Simko Reşîdî eşkerayîye wende. Eşkerayîye de ame vatene ke kurdî şerê zereyî nêwazenê; yewî û haştîye wazenê.

Dima nameyê Hizba Şue ya Kurdistanê, Hizba Zehmetkêşên a Kurdistanê, Tegêrayîşê Azadî, Torra Rêxistina Silêmanî û Komeleya Afretan a Kurdîstanî mesajî ameyî dayene. Mesajan de polîtîkaya şerî ya PDKyî ameye rexnekerdene û ame vatene ke wa meseleyî pê dîyalogan bêrê çareserkerdene.