Şêx Seîd û embazê ey 29ê hezîrana 1925î de bi bira Mehkemeya Îstîklalî ameybî dardekerdene.

Amed de Şêx Seîd û 46 embazê ey serrgêra 97. ya dardekerdişî de Meydanê Dagkapiyî de ameyî yadkerdene. Rêxistinê HDP û DBPyî, hêzê demokrasî û kede, endam û îdarekarê  Komeleya Şêx Seîdî  û xeylêk hemwelatîyî tewrê yadkerdişî bîyî.

Wasî û tornê Şêx Seîdî Mehmet Kasim Firatî yadkerdiş de qisey kerd û vat: ''Ma serê rayîrê Şêx Seîdî de yê. Wa sîyasetê înkar û îmha rê lanet bêro. Şêx Seîd rayberê ma yo.''

Nameyê Komeleya Şêx Seîdî ser o Hemşaredarê Erxanî Ahmet Kayayî eşkerayîye wende û waşt ke wa cayê goranê Şêx Seîd û embazanê ey bêro eşkerakerdene.  Kayayî bale ante ser ke dewlete seba ke kurdan bêvîr bikera cenazayê înan nêdayê û vat: 'Sere de Şêx Seîd û embazê ey, wa cenazayê pêro şehîdanê ma bêrê dayene.''

Sînan Çîftyurekî nameyê Partîyanê Îtîfaqê Kurdîstanîyî ser o qisey kerd û vat: ''Hema zî ma goranê înan nêzanenê. La ma do wayîrê dewayanê înan vejîyê. Ez venga ê partîyanê ke Amed de derheqê meseleya kurdan de qisey kenê dana ke wa cayê goranê bi hezaran kesan eşkera bikerê.''