Şirnex û qezayanê ci de şar saete 07.00 de şi sindoqan ser. Merkezê Şirnexî de 19 wendegehan de raydayîşî dewam kenê û her cayan de tedbîrê asayîşî ameyê girewtene. Hemwelatijê ke seba raydayîşî şinê wendegehan hetê polîsan ra yenê sehnayene. Nêzdîyê banê HDP’yî yê bajarî de wesayîtê zirxinî ameyê vindarnayene.

Rixmê hewayê serdin û varayişî hemwelatijî eleqeyêkê girdî musnenê weçînayîşî.  Mîyanê raydayoxanê şodirî de Namzedê Hemşaredarîye yê HDP’yî Hîşar Osal û Nurcan Alturke, parlamenterê HDP’yî yê Şirnexî Hasan Ozguneş zî estbî. HDP seba îhlalê ke do bêrê kerdene masaya krîzî ra teqîb keno.

Cizîre

Cizîre de zî rixmê varişî hemwelatijî şîyî sindoqan. Namzedê hemşaredarîye yê HDP’yî Berîvan Kutlu ve Mehmet Zirixî ard ziwan ke, weçînayîş wa bibo wesîleya qedîyayîşê zextan.

Hetê bînî ra gurbêka partîya ke parlamentera HDP’yî ya Şirnexî Nuran Îmîre zî mîyan de, şîyî  zîyareta Dibistana Îsmaîl Ebul Îzî labelê polîsan verê înan birna û nêverdayî bikewê dibistane. Munaqeşeyan ra dima grube dekewte dibistane.

Mêrdîn

Mêrdîn û qezayanê ci de zî saetanê şodirî de kirarîya raydayîşî dest pêkerde û dewam kena. Bajar de şar eleqeyê girdî mojneno weçînayîşî û der û dorê wendegehan de polîsê sîvîlî pawenê. Tayê taxanê ke HDP’yî xeylî rayî girewte de tîmê taybetî dorê dibistanan de pawenê.

Saetanê şodirî de ciwanan ra zîyade kokimî şîyî sindoqan ser. Hemwelatijê astengdarî bi hetkarîya merdimanê xo şîyî sindoqan ser.