Kampa Multecîyan a Şehîd Rûstem Cûdîyî (Mexmûr) de şar tewr zaf giranîye dano Dezgehê Keyeyanê Şehîdan. Dezgehê Keyeyanê Şehîdan ê Mexmûrî bi qerardarî bi merkezê şehîdan û merkezê rêxistinkerdiş û perwerdekerdişê komelî.

Dayîke Emîne ya ke dewa Hedrîşî ya qezaya Qilebanî ya Şirnexî ra ya û 28 serrî yo dezgeh de xebitîyena, ANFyî rê qala xebatanê înan kerde.

Dayîke Emîne da zanayene ke înan verî xeymêke akerde, tede fotografê şehîdan daliqnayî û kerd merkezê xo. Dayîke Emîne vat: ''Roja sêşemeyî keyeyê şehîdan tîya de kom bibîyêne û seba rêxistinîya komelî karî ameyêne kerdene. Wexto ke şehîdê ma bibê dezgehî keyeyanê şehîdan qisey kerdêne, merasîm viraştêne û şîn ronayêne.''

1997 de wexto ke şarî koçê kampa Nînova kerdêne înan xeyme û fotografê şehîdan zî tede berdî. Dayîke Emîne vat: ''Barkerdişî ra verî ma fotografê şehîdan teslîmê keyeyî kerd. Nînova de ma reyna xeyma xo akerde û keyeyan ra fotogragî girewtî, reyna daliqnayî. Ma 9 mengan tîya de mendî û dima koçê Mexmûrî kerd. Mexmûr sey çolî bibi. Waştiş û fikrê Rayberîye û partîye ser o ma uca de ca bîyî.

Şarî pîya dezgehê şehîdan awan kerd. Dima ma xo rê bînayêka pîle viraşte. Merkezê ma vera vera bi merkezê kombîyayîşî û xebatanê rêxistinkerdişî. Amed, Wan, şaristananê bînan ê Vakurê Kurdîstanî ra û welatanê bînan ra merdimî ameyî zîyaretê ma, înan goş da hîkayeya ma ser. Bi nê hawayî têkilîyê ma zî aver şîyê.''