Dîyar Xerîb (Helmet)o ke 25 serrîya xo de tewrê têkoşînî bi şorişgêr û têkoşînero fedakar bi. Dima ke tewrê têgêrayîşî bi hetê Rayber Apoyî de perwerde dî. Helmet derheqê tarîxê kurdan de hîşmend û zanaye bi Dîyar Xerîb dima zî bi fermandaranê rayberan ê têkoşînî ra yew û 5ê temmuza 2019î de hêrişêkê hewayî yê dewleta tirke ya îşxalkere de şehîd bi.

Nameyo raştikên ê Helmetî Dîyar Xerîb Mihemed Resûl o. Helmet serra 1973î de dewa Sêwsênanî ya qezaya Qeredaxî ya Silêmanî de dadîya xo ra bi. Keyeyê ey zî keyeyêko welatperwer bi. 

Şehîd Helmet serra 1980î de dewe de dibistane verêne qedînaye. Dadî û babîyê ci zî seba perwerde zaf paştî da ci. Dadîya Helmetî qala ci kena ke şehîd Helmet cuya xo ya perwerdeyî de tim wendekarêko serkewte bi.

Dibistane ra dima şehîd Helmet perwerdeyê xo yê lîseyî Silêmanî de keno temam û seba zanîngehî şino Hewlêr. Serra 1991î de kekê ey Dilêr Kerkûk de sey yew pêşmerge şehîd beno. No şehadet zaf tesîrê Dîyar Xerîbî keno.Dîyar Xerîbî Serewedaritişê 1991î ra dima PKK şinasneno. Verî ke tewrê PKKyî bibo waştîya xo ra nê çîyan nuseno: ''Raşt o ez to ra zaf hes kena la zerrîya mi de heskerdişêko bîn zî esto. Nameyê ci Kurdîstan o. Ez pê bawer a ke ti do fam bikera ez seba heskerdişê xo yê Kurdîstanî heskerdişê to ra fek vera dana.''

Dîyar Xerîb serra 1996î de tewrê PKKyî beno û serra 1997î de komêke reyde şino cayê Rayberê Şarê Kurdî Abdullah Ocalanî. Pê coşêkî tewrê perwerdeyê Rayberîye beno. Pê analîzan û ercnayîşanê xo bala Rayber Apoyî anceno. Rayber Apoyî ci rê vano: ''Ti eşkenî bibî rayberêkê nê têkoşînî. Ti ciwanêko bihuner î.'' Serra 1998î de sey perwerdekar têkoşîn de cayê xo gêno û serra 1999-2000î de zî binê sîwana YNDKyî de xebata rêxistinkerdişî ano ca.

Dîyar Xerîb serra 2002î de komêka ke tede Vîyane Soran zî esta reyde Partîya Çarserîya Demokratîke ya Kurdîstanî (PÇDK) awan keno. Şehîd Helmet kongreya 5. ya PÇDKyî de sey serek yeno weçînayene. 2008î ra heta 2014î zî serekîya xo ano ca.

Şehîd Helmet serra 2014î de beno  endamê Konseya Serekîya Pêroyî ya KCKyî û heman wextî de wezxîfeyê endamê Meclîsê PKKyî zî ano ca. Heta ke şehîd beno kadroyanê neweyan ê têgêrayîşî rê perwerde dano. Bi taybetî Başûr de vera xeta îxanet û hemkarîye têkoşînêkê pîlî dano. 

Şehîd Helmet tim pê qerardarî û bawerdarî xebatê xo ardî ca. O heman wextî de rojnamegêrêko zixm bi. Derheqê tarîx, ciwanî û îdareyê demokratîkî de xeylêk kitabî nuştî. Nameyê kitabê ey wina yê: Dîroka Iraq û Başûrê Kurdistan, Manîfestoya Ciwanên Başûrê Kurdistan, Xwerêveberiya Demokratîk, Krîzên Siyasî û Pirsa Pêşengîtî li Başûrê Kurdistan, Helwestên Derbatê Ol û Bawerî û Dîtinek Nû Li Dîroka Kurdistanê.

Dîyar Xerîb 5ê temmuza 2019î de hêrişêkê hewayî yê dewleta tirke ya îşxalkere yê vera Qendîlî  de şehîd bi.