Nê rojan de Cizîre de tay kesî xo sey polîsan danê şinasnayene û şarî rê ajanîye ferz kenê. Tewr peyên qezaya Cizîre ya Şirnexî de 3 mengan de 2 hezar keyeyan rê telefon kerd û pê gefan înan rê ajanîye ferz kerde. Endamê Meclîsê Şaredarîye Cizîre yê Îtîfaqê Kurdîstanî Îbrahîm Kayayî rê zî ajanîye ameye ferzkerdene. Kayayî ard ziwan ke o do gerreyê ê kesan bikero û vat ê do  polîtîkayanê winasênan qebul nêkerê.

Kayayî pare kerd ke 10 rojî verî 3 kesan verê ey girewt û xo sey polîsan da şinasnayene. Kayayî vat: ''Înan mi rê va ma şorê keye û îdîa kerd ke wextê qedexeyê vejîyayîşê kuçeyan de mi nobete girewta û çalakîyê çekdarî kerdê. Mi va şima mi rê îftîra kenê. Înan mi rê ajanîye ferz kerde û hewteyêk da mi ke ez bifikîra. Mi înan rê va ez do naye qet qebul nêkera. Nê serebûtî ra 5 rojan dima ez kuçeyan de gêrayêne. Wesayîtêk ame mi hetî û vat ê polîs ê. Înan nasnameyê mi girewt û waşt ez cinuşa wesayît. La mi qebul nêkerd. Mi vat eke mesele esta ez eşkena bi xo bêra asayîş. Dima ê şîyî.''

 Kayayî wina dewam kerd: ''Wa baş bizanê ke ma do vera nê polîtîkayan sereyê xo nêarê war, ma do têkoşînê xo dewam bikerê.''