Colemêrg de zafê roniştoxî kenê ke bi komirî xo germ bikerê. Rixmo ke di serrî verî gazo xozayî ameyo şaristanî şarî rê komiro bêkalîte yeno ferzkerdene. Komiro bêkalîte yo ke seba rantî roşîyeno hem hetê madîyî ra zehmet o, hem zî hewa herimneno. 

Colemêrg komirî ra mîyanê şaristananê tewr lêşinan de cagêno. Gazo xozayî nika têna qismêkê qijî yê şaristanî de şuxilîyeno. Goreyê roniştoxanê herême AKP-MHP qestî ra nêverdeno le gazo xozayî şaristan de bişuxilîyo. Goreyê nînan seba ke komir hetê fîrmayanê terefgîranê AKPyî ra roşîyeno gazo xozayî nêno dayene. 

Huseyîn Demîrî ard ziwan ke taxa înan 10 deqayan dûrê merkezî de ya la rixmê ney zî gazo xozayî nêdîyayo taxa înan. Demîrî vat: ''Zimistanan hewayo lêşin şaristanî ser o vila beno. Hewayê lêşinî ra nefesê ma birîyeno, doman û kokimî binê tesîrê ney de maneno. 50 serrî yo lûleyê gazê xozayî Colemêrgî ser ra şinê şaristananê Tirkîya û welatanê bînan la nêdîyeno ma. Şarê ma rê qestî ra gazo xozayî yeno ferzkerdene.''

Demîrî îfade kerd ke gazo xozayî goreyê komirî hem ercan o hem zî dostê weşîye û xoza yo. Demîrî waşt ke wa temamîya şaristanî rê gazo xozayî bêro dayene.