Bajaranê Vakurê Kurdistanî de Rewşa Nêaleladeye dewam kena, heme çalakîyê demokratîkî ameyî qedexekerdene, sere de ware û mergan de bazirganîye şarî rê ameye qedexekerdene û ambargoya ekonomî serê çimeyanê derbare yê şarî de yena bicaardene. Bajaranê Vakurê Kurdistanî de bêkarîye reste sewîyeya se ra 80’yî. Herinda fabrîqeyan de, hepisxaneyî yenê awankerdene.

Goreyê doneyanê Mudurîya Pêroyî ya Hepisxaneyan a Wezaretê Edaletî, heta Adara 2019’î Tirkîya û Vakurê Kurdistanî de 313 hepisxaneyê girewteyî, 75 hepisxaneyê akerdeyî, 9 hepisxaneyê cinîyan ê girewteyî, 8 hepisxaneyê akerdeyî yê cinîyan, 7 hepisxaneyê domananê girewteyî, 5 hepisxaneyê ‘keyeyê perwerdeyî’; temamê ci 396 hepisxaneyî estê. Kapasîteyê înan restê 220 hezar 8 kesan. Wezîrê Edaletî yê Tirkî Abdulhamît Gulî 2018 de cewab da pêşnûma persêk û da zanayene, hepisxaneyan de 260 hezar 144 kesî estê. Înan ra 202 hezar 434 kesî hukimwerdox ê, 57 hezar 710 kesî girewtî yê. Serdestdarîya AKP-MHP’yî plan kena ke heta serra 2021 40 hepisxaneyanê bînan awan bikera. Wezaretê Edaletî da zanayene heta 5 serran 193 hepisxaneyî do bêrê awankerdene.

Wan, Bedlîs, Qers, Îdir de hepisxaneyê neweyî, bajaranê serê sînorî yê sey Colemêrg de zî bi seyan kalekol, qeraqol û nuqtayê sahnekerdişî yenê awankerdene. Exlat, Qers, Wan, Îdir, Erdîş de hepisxaneyê neweyî yenê awankerdene ke beşêkê girdî yê înan qedîyayê.

Hetêk ra, qezaya Exlatî ya Bedlîsî de seba  Serekkomarê Tirkî Erdoganî qesrêk yena awankerdene. Hetê bînî ra zî hepisxaneyê neweyî yenê awankerdene. Hemwelatijê qezaye nê awankerdişan nêwazenê. Hemwelatijê Exlatî vanê, dewlete seba xo qesre, seba şarî zî hepisxaneyan awan kena û da zanayene ke, ê ne qesre ne zî hepisxaneyan wazenê.