Komeleya 78'an a Amedî Alî Çîçeko ke 14'ê Temmuze 1982 de vera caardişanê Hepisxaneyê Amedî de rojeyê mergî de şehîd bîyo, serê gorê ci de yad kerd. Wextê vîrardişî de wekîlê Partîyan Şaran a Demokratîke (HDP) Mûsa Farisogullari, Remziye Tosûne, Salîha Aydenîze û rayberê HDP'ê û DPB'yî zî amade bîyî.

Alkan: Wa waştişê girewteyan bêrê qebûlkerdene

Serekê Komeleya 78'an Ganî Alkanî serê gorê Çîçekî de qisey kerd û vat, ''Alî Çîçek hevalê ma yê rayîrî bi. Mîraso ke înan zîndananê Amedî verdayo ewro resto  bi hezaran kesî. Ewro bi serkêşîya Leyla Guvene 7 mengî yê grevê vêşanîye dewam keno. Wa waştişê girewteyanê ke grevê vêşanîye de yê bêrê qebûlkerdene.”

Avûkatî ganî bieşkayê Rêzdar Ocalanî bivînê

Farisogullarî zî vat, Alî Çîçek û hevalê ey seba estbîyayîş û ameyoxê şarî xoverdayîşêko gird da û xoverdayîş ewro zî dewam keno. Farisogullarî vat, “Ê yê ke kewtê grevê vêşanîye bîyî vengê Leyla. Hepisxaneyanê Tirkîya de bi hezaran merdimî grevê vêşanîye de yê. Wezîrê Edaletî di rojî verê cû eşkerayîye daye. Eşkerayîye pratîk de nêameye ca. Reyna Rayberê Şarê Kurdî Abdullah Ocalan nêeşkeno avûkatanê xo reyde pêvînayîşan bikero. Ez vengdayîş bi selahîyetdaran kena. Na bêhuqûqîye biqedênê. Dewlete ganî wezîfeyê xo bîyaro ca.”