Parlamenterê HDP’yî yê Dêrsimî Alîcan Onlûyî derheqê netîceyanê weçînayîşê cayîyan ê 31’ê Adare de eşkerayîya nuştekîye daye. Onlûyî da zanayene ke, bi netîceyê stratejîya partîya înan heme Tikrîya de verê tifaqê AKP-MHP’yî ameyo girewtene û vat, “Polîtakaya ke HDP’yî teqîp kerda, sere de şarê ma, seba cinîyan, ciwanan, hêzanê kedkaran û seba yê bînan wareyê têkoşînê cimatkî akerdo.”

Ma ozrê xo wazenê

Onlûyî netîceyê weçînayîş ê cayîyan zî ercnayî û vat, seba ke înan stratejîya weçînayşî ya raste  rê rayberîya pratîkêka raste nêkerda, seba ke xebatan de kêmasîya înan esta şarî ra ozrê xo waşt û seba namzedanê ke ser kewtê zî serkewtişî waşt.

Ma do teqîpkarê ci bibê

Onlûyîyî eşkerayîya xo wina dewam kerd, “Dêrsim de karê verên ê hêzanê demokrasî, ganî bingeyî pîyaciwîyayîşî afernayîş û texrîbatanê qeyûman werdaritiş bo. Ganî ma kultur, ziwan û xozaya Dêrsimî êwayîr bivejê û şaredarîyê ke ma kerdê ra xo dest şarê reyde îdarê bikerê. Serê de Yewîya Hêzî ya Şorişgêre ya Dêrsimî ya ke şaredarîya Perî kerde ra xo dest, ganî texrîbatê ke qeyûman vetê werte pak bikerê û merkez û qezayan de endamê meslîsê ma do teqîpkarê ci bibê.”

Ma do Dêrsim rê wayîr bivejîyê

Onlûyî ard vîrî ke, wexto ke qeyûm Şaredarîya Dêrsimî ra ame tayînkerdene, xebatê qeyûmî yo tewr verên bedilnayîşê tabela bi û qeyûmî tabelaya Dêrsimî naybî ro û tabelaya Tuncelîyî şaredarîya înan ra darde kerdibi û vat, “Qeyûmî bi naye waşt ke înkar û sîyasetê asîmîlasyon ê 90 serran dewam bikero. Şaredarîya Dêrsimî ra newe ra dardîkerdişê tabelaya Dêrsimî, vera înkar û polîtîkaya asîmîlasyonî de vindertişêk, yeno manaya sembolê pawitiş û ciwînayîşê kulturê Dêrsimî. “

Onlûyî peynîya eşkerayîya xo de wina vat, “Ma do kêmasîyan ê xo bivînê, zaf hetan ra analîz bikerê, netîceyan bigîrê û kultur, xoza û merdimanê Dêrsimî ra wayîr bivejîyê.”