Dinya ke rîyê vîrusê Korona ra tengayî ancena de problemê maskeyan esta.  Tirkîya vana ma xeylêk welatan rê hetkarîya maskayan kerda la  Kurdîstan û Tirkîya de bi milyonan kesî nêeşkenê maskeyan dest bifînî. Hukmatê tirkî yo ke sey xeylêk çîyanê bînan rîyê maskeyan ra zî yeno rexnekerdene tewr peynî de qerar girewt ke ê do bi pereyî maskeyan vilabikerê. Hemwelatijî seba ke nê prosesê zehmetî de paştî bide yewbînan bi îmkananê xo maskeyan derzenê.

Peyasê Amedî de dikanê terzî yê wayanê Ayşe û Celîle Guler de bi vernîyazê mamosteya înan Mune Can hîrê cinîyî maskeyan derzenê û kesê ke hewceyê ci pê esta nêeşkenê maskeyan peyda bikerê înan rê vila kenê. Cinîyî vanê ma hem paştî danê hem zî bi na game destûr nêdane jan ma rê nizdî bo. Cinîyê ke heme malzemeyî bi îmkananê xo peyda kenê 2 rojan de 500 maskeyî deştî.  Cinîyan vat ê do maskeyan pîya bi Partîya Demokratîke ya Şaran (HDP)  vila bikerê. Cinîyan seba ke xeyrê înan reseno kesanê feqîran keyfweşîya xo ard ziwan û vat prosesanê wînayênan de bi paştdayîş û yewbînan rê wayîrvejîyayîş çew eşkeno ser bikewo.