Konferansê Rêxistina HDPyî ya Amedî bi şîara ''Ma bi hêvî û çêrî rêxistin bibê, faşîzm bin bikê'' roja xo ya 2. de ya. Konferans salona bînaya HDPyî ya Vedat Aydinî de yeno kerdene û Wekîlê HDPyî Musa Farisogullari, Dersime Dag û Remzîye Tosun zî tede hemşaredarî, delegeyî û bi seyan kesî tewrê konferansî bîyî.

Ma Do Tecrîdî Bişiknê û Faşîzmê Qeyûmî Birijnê

Hemserekê HDPyî yê Amedî Zeyyat Ceylanî vera destbendkerdişê Hemşaredara Sûrî Fîlîze Buluttekîn nêrazîbîyayîşê xo mojna û ard ziwan ê do qet xespanê qeyûmî qebul nêkê. Ceylanî bale ante yewîya neteweyîye ser û vat ke kurdî bi seserran yenê astengkerdene la hînî ê vera nînan têkoşîn kenê. Ceylanî bi hawayêkê xurtî da zanayene ke ê do yewîya kurdan awan bikê.  Ceylanî derheqê tecrîdê vera Rayberê Şarê Kurdî Abdullah Ocalanî û xespê şaredarîyan de qisey kerd û vat: "Se kenê wa bikê, ma do rojdemê xo ser bixebitê. Ma do tecrîd bişiknê û faşîzmê qeyûmî bin bikê." Konferans çapemenîye ra ame girewtene û bi nê hawayî dewam kerd.

Baroyê Amedî: Îradeyê Şarî Yeno Binpaykerdene

Baroyê Amedî ewro eşkerayîyêke kerde û vera destbendkerdişê Hemşaredara Sûrî Fîlîze Buluttekîn nêrazîbîyayîşê xo mojna.  Eşkerayîye de wina ame vatene: "Ma na bêhuqûqîye ke îradeyê şarî binpay kena qebul nêkenê. Ma wazenê ke hemşaredarê tepişteyî cade bêrê veradayene û abigêrê wezîfeyanê xo." Baroyê Amedî vat ke Hemşaredare Buluttekîn erdî ser o ameye raqeldayene û hetê mêrdeyê ci û domananê ci de sereyê ci rê çeke ameye antene. Eşkerayîya Baroyî wina dewam kerd: "Weçînayîşan ra hema 9 mengî zî nêvîyartî la 33 şaredarîyan rê qeyûmî ameyî tayînkerdene. Nê zî demokrasî û îradeyê şarî çin kerd."