HDP: Amed de kayêko sîyasî  yeno kaykerdene

Hemserekê HDP’yî yê Amedî Zeyyat Ceylanî da zanayene ke tayî keyeyê ke verê banê partîya înan de bi  îdîaya, ‘domanê înan ameyî berdene bi koyî‘ çalakî virazenê, ê hetê asayîşî ra ameyî şawitene û no sey kayêko sîyasî name kerd.

Rêxistina Partîya Şaran a Demokratîke (HDP) ya Amedî derheqê keyeyanê ke verê banê înan de çalakî virazenê de eşkerayîyêk daye û pê hesna ke nê keyeyî hetê hukmat ra ameyî organîzkerdene û vat no kayêko sîyasî yo.

HDP Tim Vera Mergî Cuye Paweno

Hemserekê HDP’yî yê Amedî Zeyyat Ceylanî ke eşkerayîye de qisey kerd va:‘‘ îqtîdarê AKP-MHP’yî yo ke rixmê heme hêrişanê xo nêeşkeno vernîya partîya me bîge, na rey dest bi kayêkê sîyasî kerd. Keyeyê ke domanê înan bîyî vînî ya zî nêameyî keye şawenê verê banê partîya ma ke ma bêîtabar bikerê. Xora yeno zanayene ke banê partîya ma 24 saete bi kamera, TOMA û wesayîtanê zirxinan binê ablûqa de yo. Eke hêzê asayîşî zanê tîya ra ciwanî ameyî şawitene bi ko û mudahalê nêkerd o no suc o. Reyna nê şawitişê keyeyan ê ke dimayê qeyûmî dest pêkerd eşkerayo ke  kayêko sîyasî yo. Ma zanê nê komplo û îftîrayî hetê kamî ra yenê kerdene. Ma do bi rayîranê huqûqî mucadeleyê xo bidê destpêkerdene. Bi nê zûran çew nêeşkeno vernîya xoverdayîşê ma bigêro û partîya ma krîmînalîze bikero. Her kes naye zaf hol zano ka partîya ma merkezê sîyasetê demokratîkî ya û polîtîkaya haştîye rayra bena. HDP tim vera mergî cuye paweno. Ma çi rey sîyasetê xo ra tawîz nêda, ma do tewîz medê.‘‘

'Wa Mayanê Şemeyî Zîyaret Bikerê‘

img

Hetê bînî ra cinîyan ê Partîya Vatanî waşt ke verê banê HDP’yî de  eşkerayîya çapemenîye bidê. Parlamentera HDP’yî Remzîye Tosûne û partîyijan desturê înan nêda.Tosûne no sey provokasyon hesibna û va: ‘‘Eke wazenê keyeyan zîyaret bikerê wa şirê keyeyanê Mayanê Şemeyî zîyaret bikerê.‘‘