Bi seyan partîyanê sîyasîyan û rêxistinanê komelê sivîlî seba şinasnayîşê Îdareyê Xoserî yê Rojawanê Kurdîstanî bi sernameyê ''Rojawanî rê statu, şaran rê azadîye'' kampanyaya îmzayan daye destpêkerdene. 

Kampanya bi deklarasyonêkî ameye îlankerdene. Hemsereko Pêroyî yê DBPyî Keskîn Bayindir zî tewrê deklarasyonî bi. Kaykerdoxê tîyatroyî Ozcan Ateşî deklarasyon wend.

Deklarasyon de ame parekerdene ke Rojhelato Mîyanên krîzêkî ra derbaz beno û çareserîya nê krîzî zî awankerdişê sîstemêkê azadî ra derbaz bena. Deklarasyon de dîya zanayene ke raştîya Sûrîye de serebûtê Rojhelatê Mîyanênî mojnenê ke projeyê dewleta netewe hinî nêeşkeno payan ser de vindeno. 

Deklarasyon wina dewam keno: ''10 serranê peyênan de modelê îdareyê Rojawanî yo ke serkêşîya cinîyan de ronîya şaran rê îmkanê haştî û aramîye afernayî. Dewleta tirke ewro xîret kena ke nê modelî çin bikera. La çend reyî îsbat bîyo ke polîtîkayê çinkerdişî do faydeyê çîyêkî nêkerê. Eqsê ci nê polîtîkayî benê sebeb ke meseleya kurdan biba meseleyêka mîyanneteweyîye.

Ma sey partîyanê sîyasîyan, rêxistinan û dezgehanê demokratîkan qewimîyayîşanê Sûrîye û Rojawanî nêzdî ra teqîb kenê.

Rayaumûmîye rê qiseyê 'Peymana Komelkî ya Rojawanî' anê vîrî; 'Seba awankerdişê edalet, azadî û demokrasîyî komelêkê têdûşt û ekolojîkî de cîyakerîya dîn, ziwan, nîjad, bawerî, mezheb nêbenê. Seba pawitiş, azadî, hûrmet û xopawitişî. Ma sey şaranê herêmanê xoseran na peymane tesdîq kenê.'

Ma veng danê ke şarê Rojawanî hinî bêstatutîye rê tehamul nêkenê. Çareserîya meseleya kurdan haştîya Rojhelatê Mîyanênî do xo reyde bîyara. Ma venga terefan danê ke Îdareyê Xoserî bişinasnê û paştî bidê awankerdişê îdareyêkê demokratîkî yê Sûrîye.''