Amed de hemwelatîyêkê/a 35 serre yo/ya ke Nêweşxaneyê Perwerde û Cigêrayîşî yê Gazî Yaşargîlî de tedawîyê vîrusê Korona dîyene vizêr şan dinyaya xo bedelnaye. Bi nê hawayî Amed de hûmara kesanê ke vîrusê Korona ra merdî bîye 10.

Taxa Adnan Menderesî ya qezaya Erxenî ya Amedî de zî apartmanêke gêrîyaye binê karantîna. Ame zanayene ke apartman de keyeyê bi 9 kesan rîyê adirê berzî û tengîya nefesî wedarîya Nêweşxaneyê Dewlete yê Erxenî. Nê kesan ra kesêk/e nêweşxane de yeno/a weşkerdene, ê hemwelatîyê bînî zî keye de gêrîyayî binê karantîna.

Hetê bînî ra ewro ra tepîya do dekewtiş û vejîyayîşê qezaya Sûrî mabênê saetanê 08:00 û 18:00 de seba wesayîtan bêrê girewtene. Şaristan de Dagkapi, Tekkapi, Çîftkapi û Mardînkapi de noqtayanê kontrolê polîsan de adirê hemwelatîyan do bêro peymitene.

Noqtayanê kontrolî de derbazbîyayîşê kesanê ke serra înan 60î ra pîlêr yan zî 20î ra qijêr ê û nêweşîê kronîkî yê qedexe yê. Hemwelatîyê bînî zî dima ke adirê înan bêro peymitene eşkenê noqtayanê kontrolî ra derbaz bibê.

Şaristan de nê cadeyan de noqtayê kontrolî do bêrê awankerdene: Cehdeyê Zîya Gokalpî yê qezaya Erxenî, cehdeyê Îstasyonî yê qezaya Sîlvanî, kuçeyê Ofîsî û cehdeyê Gevranî yê qezaya Yenîşehîrî, cehdeyê Huzurevlerî û Dr. Sitki Guralî yê qezaya Kayapinarî.