Xebata Îtîfaqê Kurdîstanî û Platformê Cinîya Kurde derheqê têkoşînê vera qirkerdişê cinîya kurde Jîna Mehsa Emînî de Amed de eşkerayîye daye. Qiseykerdişê akerdişî Hemsereka Pêroyî ya DBPyî Salîha Aydenîz kerd û dima ra eşkerayîye kurdkî û tirkî ameye wendene.

Aydenîze vat: ‘’Rejîmê faşist û dîktatorî her cayê dinya de tim verî cinîyan hedef genê. Qirkerdişê vera cinîyan her ca de polîtîk ê. Bitaybetî Kurdîstan de zîhnîyetê dewlete camêrdî vera cinîyan qirkerdişan keno. Sîstemê dewlete her tim her ca de hêrişê cinîyan keno. Ma nê qirkerdişî şermezar kenê û xoverdayîşê vera nê qewimîyayîşê faşîstî ma selam kenê. Ma sey cinîyan do çirey verê zextan de milê xo çewt mekerê, peyser game meerzê û tim vera sîstemê serdestî yê camêrdan têkoşîn bikerê.’’

Eşkerayîye de nê ameyî vatene: ‘’Destê xo serê îradeyê ciwan ra biancê. Bêehlaqîya xo sey ehleqî cinîyan û komelî rê ferz mekerê. Cinî sereyê xo gena ya zî akena no qerarê aye yo. Ganî qeraranê cinîyan rê hurmet bêro ramojnayene. Qet yew îqtîdar û camêrd nêeşkeno mudaxaleyê îradeyê cinîyan bikero. Ma veng danê cinîyan û şaran ke wa vera zîhnîyetê faşîstî yê vera cinîyan sere wedarê. No xoverdayîşê vera rejîmê Îranî hemleya azadîye ya neteweyîye ya. Ma sey Xebata Îtîfaqê Kurdîstanî û Platformê Cinîya Azade paştî danê nê serewedaritişî û veng danê heme hêzanê neteweyî û demokatîkan ke wa paştî bide nê têkoşînî. Bêvengîya vera nê hêrişan paştî danê rejîmê faşîstî û verê qirkerdişê cinîyan akena. No têkoşîno hempar eşkeno Tahran de demokrasîyî aver bêro û şarê kurdî rê nefesêk bido girewtene. Bêrê ma pêro pîya bibo yew vere rejîmê faşîstî yê Îranî bigêrê. Ma veng danê dezgehanê eleqedaran ê Ewropa ke wa vera polîtîkayanê qirkeran û cînskî yê Îranî bêveng memanê, wa vera Îranî tewir bigêrê.’’

Partîyê ke mîyanê îtîfaqî de ca gênê wina yê: Kongreya Komelê Demorkatîkî (KCD), Partîya Herêmanê Demokratîkan (DBP), Partîya Demokratîke ya Şaran (HDP), Partîya Azadî, Komeleya Kurdan a Demokratîke ya Şorişgêre (DDKD), Partîya Azadîye û Merdiman (PÎA),Partîya Komunîste ya Kurdîstanî (KKP), PDK-Vakur, Platformê Demokratan ê Kurdîstanî (PDK) û Partîya Demokratîke ya Kurdîstanî ya Tirkîya.