Seba ke polîsan destûr nêda ke rêxistina HDP'yî ya Yenîşehîrî eşkerayîya seba Rojawanî bide, eşkerayîye pencera ra ameye wendene. Hezexê Şirnêxî de zî polîsan pê gazî û awe tazikêne hêrişê kerd. Wekîle û hemsereka şaredarî xo ra şîyî.
Rêxistina HDP'yî ya qezaya Yenîşehîrî ya Amedî waşt ke verba îşxalkarîya serê Vakur û Rojakewtena Sûrîye verê bînaya HDP'yî de eşkerayîyêke bike. Polîsan dormeyê bînaye girewt û qerarê qedexekerdişê çalakîyan sey semed mojna û destûr nêda ke eşkerayîye bêra kerdene.
Amed de Eşkerayîye Pencera ra Ameye Dayene
Polîsan nêverda ke Wekîla HDP'yî ya Amedî Remzîye Tosune zî tede partîyîjî bivejîyê teberê bînaye. HDP'yîjan pencera ra pê megafonî eşkerayîye daye. Wekîle Remzîye Tosune va: "Şer neheq û bêhuqûqî yo. Îqtîdarê AKP-MHP wazeno ke demografîyê Rojawanî bivurno û seba naye her tewir qetlîam û qirkerdişan kenê. Seba ke nêwazenê Kurdî bibê wayîrê statuyêk sey IŞÎD'î çeteyan reyde îtîfaq kenê."Dimayê eşkerayîye slogana "Biciwîyo Xoverdayîşê Rojawanî" ameye vatene.
Şirnex de Polîsan Hêrişê HDP'yijan Kerd
Qezaya Hezexî ya Şirnexî de polîsanê Tirkî Rêxistina HDP'yî ya ke waştene eşkerayîye bikere rê hêriş kerd. Wekîla HDP'yî ya Şirnexî Nuran Îmîre û Hemsereka Şaredarîye Sungul Erden zî tede zafê partîyîjî û şar seba ke eşkerayîye bike bînaya HDP'yî de ameye pêser. Bînaye hetê polîsan û wesayîtanê zirxînan ra amebi dormegirewtene. Polîsan destûr nêda û pê gazê îsotî û awa tazekêne hêrişê qefleyî kerd. Hêrişê polîsan de Nuran Îmîre û Songul Erdene zî tede xeylî kesî xo ra şîyî û ambûlans ame vengdayene. Verê bînaye de alozîye dewam kena.
