Amed û Riha de polîsan xîret kerd ke çalakîya 'Zîncîrê Merdiman' ê HDPyî yê seba Roja Haştîye ya Dinya asteng bikerê la hemwelatîyan astengîye nas nêkerdî.

Rêxistina HDPyî ya Amedî waşt ke Meydanê Şêx Seîdî ra heta Berê Riha çalakîya Zîncîrê Merdiman bikero. La polîsan bi bahaneya tedbîranê asayîşî çalakîye asteng kerde. Wekîlê HDPyî, îdarekarê HDPyî, temsîlkarê KCDyî, Têgêrayîşê Cinîyan ê Azadan (TJA), Mayê Haştîye, Partîya Komunîste ya Kurdîstanî, Partîya Sosyalîste ya Bindestan û xeylêk kesî Meydanê Şêx Seîdî de ameyî pêser. Polîsan dormeyê meydanî girewt û dest na dowîzan ser. Girseyî  sloganê 'Tecrîdî rê nê, haştîye nika' vat. Polîsan nêverda ke wekîlî û şar bêrê têhet.

Dima HDPyî Berê Riha de eşkerayîye daye. Hemsereka KCDyî Leyla Guven pare kerd ke ê seba haştîye kom bîyî û vera walîyê Amedî nêrazîbîyayîşê xo mojna. Leyla vat: ''Ma hol zanenê ke şima wazenê vengê şarî bibirnê. Ma hêrsbîyaye û qasê şima zî qerardar ê. Ma do haştîye bîyarê ca.''

Qiseykerdişê Guvene ra dima girse ver bi Berê Riha şi û çalakîye bi slogananê 'Biciwîyo Serek Apo' û 'Haştîye' qedîyaye.

Riha de zî Hemserekê BDPyî Keskîn Bayindir, aktîvîstê TJA, Wekîlê HDPyî Ayşe Surucu, Omer Ocalan, Nusrettîn Maçîn, Omer Faruk Gergerlîoglu, şar bînaya HDPyî de ameyî pêser. Polîsan dormeyê bîna girewt. Astengkerdişî ra dima girse ver bi parka Alî Şellî bi sloganan şi.

Girseyî parke de eşkerayîye daye. Omer Ocalanî vera ablûqaya polîsan nêrazîbîyayîşê xo mojna û vat: ''Ma haştîye wazenê, bi hezaran polîsî dormeyê ma gênê. Şorê dizdanê nê welatî destbend bikerê. Dormeyê haştîye megêrê.''
Wexto ke Ocalanî qisey kerdêne polîsan mudaxele kerd û dima zî hêrişê şarî kerd. 

Omer Gergerlîogluyî zî qisey kerd û vat: ''Ma seba haştîye ameyî la polîsî hêrişê ma kenê.''

Hemserekê DBPyî Keskîn Bayindirî zî hêrişî ra dima qisey kerd û vat: ''Se beno wa bibo ma haştîye ra gamêke zî apey nêerzenê. Heta ke haştî, azadî nêrê ma do têkoşîn bikerê.''

Girse rixmê hêrişê polîsan zî heta Bulvarê Ataturkî şi. Wexto ke girse şîyêne esnafan zî paştî daye ci. Polîsan reyna hêrişê girseyî kerd. Netîceya hêrişî de Hemsereka HDPyî ya Riha Emîne Çetîner xo ra şîye. Emîne Çetîner bi ambulansî wedarîyaye nêweşxane. Girse rixmê hêrişî zî derbazê Meydanê Topçuyî bi û şi binaya partî û rayraşîyayîşê xo qedîna.

Netîceya hêrişî de endamê Meclîsê HDPyî Îzzet Karadag, îdarekarê şaristanî Ahmet Îstek, Hemsereka Hîlwanî Nergîze Karageçîlî, hemserekê Xalfetî Muslum Arslan ameyî destbendkerdene û ameyî berdene bi Mudirîya Asayîşî.

Hetê bînî polîsan da pirnikê ciwanêkî ro û ciwan wedarîya nêweşxane.