Amed de bado ke yew tenî de vîrusê Korona ame tesbîtkerdene 2 bînayî, Riha de bi sebebo ke tede vîrus ameyo tesbîtkerdene taxêke  û Semsûr de zî dewêke û di kuçeyî semedê 14 rojan gerîyayî binê karantîna.

Qezaya Yenîşehîrî ya Amedî de 2 bînayê ke Ofîsê Mehsulanê Herre de yê seba ke yew tenî de vîrusê Korona ame tesbîtkerdene gerîyayî binê karantîna. Wesayîtê zirxinî verê nê bînayan de ameyî cakerdene û dewkewtiş û vejîyayîşê înan qedexe yo.

Taxa Şêxolî ya Girê Sorî ya Riha zî bado ke hemwelatijêko Îstanbulî ra ameyo de jan ame tesbîtkerdene gerîyaye binê karantîna.

Reyna dewa Borgenekî ya Semsûrî û qezaya Kahta de 2 kuçeyî rîyê janê Korona ra semedê 14 rojan gerîyayî binê karantîna.