Amed de 16 sîyasetkaran seba ke paştî bidê Leyla Guvena ke grevê vêşanîye de ya dest bi grevê vêşanîye kerdî.

Dersîm Daga HDPyîye ke serê nameyê grûbe de eşkerayî daye vat: “Waştişê Leyla Guvene waştişê ma heminan ê. Heta waştişî nêrê bicaardene do çalakîyê ma dewam bikerê.”

Sîyasetkarê HDP û DBPyîyan seba paştîdayîşê Leyla Guvene grevê vêşanîye yê bi 2 rojan da destpêkerdene. Salona Konferansî ya Wedat Aydinî ke tede eşkerayî amî dayene pankartê sey “Ma tecrîdî bişiknê, faşîzmî bipijiqnê” û “Leyla Guvene biheq a, ganî tecrîd bêro qedênayene” ameyî daliqnayene û verbendikê ke ser o fotografê Guvene estbî dayî xo ra.  

'HETA TECRÎD WEDARÎYO...'

Parlamentera HDPyî Dersim Dage vatişê Guvene yê ‘mi bi perspektîfanê birêz Ocalanî dest bi sîyaset kerd’ ard vîrî û wina vat: “Ma zî bi tehlîlanê îdeolojîkan ê birêz Ocalanî û perspektîfanê ê qerar da ke bibê îradeyê nê şarî. Waştişê Guvene waştişê ma yê zî. Ma tecrîd qebûl nêkenê û heta wedarîyo ma do çalakîyanê xo bidomnê.”

Dage ard ziwan ke înan panc şaristananê cîyayan de na çalakîya grevê vêşanîye daya destpêkerdene.

WAN DE ZÎ GREVÊ VÊŞANÎYE DESTPÊKERD

Organîzasyonê Bajarî yê HDPyî yê Wanî zî grevê vêşanîye yê bi 2 rojan da destpêkerdene.

Hemserekê bajarî yê HDPyî yê Wanî Yadîşen Karabulak û Umît Dede, hemserekê bajarî yê DBPyî Okkeş Kava, parlamenterê HDPyî yê Wanî, temsîlkarê KCDyî û aktîvîstê TJAyî tewrê çalakîya ke verê banê bajarî yê HDPyî yê Wanî de amî viraştene bîyî.

Parlamentera HDPyî ya Wanî Muazzez Orhane vat : “AKPyî bi derbeyî ke sey ‘lutfê Homayî’ name kerdibi hemverê kurdan de şer îlan kerd. Birêze Guvene ard ziwan ke tecrîd tenya hemverê birêz Ocalanî de nê, hemverê heme şarê kurdî de yo û kewte grevê vêşanîye. Ma zî seba nê vindertişê aye yê birûmetî aye silam kenê û wazenê ke vajê ma kîşta aye de yê. Seba paştîdayîşî ma kewenê grevê vêşanîye yê bi 2 rojan.” 

Muazzeze peynîya qiseykerdişê xo de vat ganî tecrîd wedarîyo û vernîya sîyasetê demokratîkî bêro akerdene. Heman wextî de tayînkerdişê qeyûmî yê bi Şaredarîya Bajarê pîlî ya Wanî û zîndan de rehîntepişîyayîşê hemserek Bekîr Kayayî zî şermezar kerd.