Vengdayîşê Rayber Apoyî yê ''Haştîye û Komelê Demokratîkî'' yê 27ê sibate rojdemê rayrapêroyîye de cayê xo paweno. La rixmo ke vengdayîşÎ aşmêke xo dima verdaye hetê dewlete ra hema zî game nêameye eştene. Ma derheqê prosesî de fîkrê Amedijan girewtî.

Mecit Urgay:  Rayberê Şarê Kurdî tim zelal o. Semedê haştîye tim samîmî yo. Tim vano o semedê haştîye û çareserî hazir o. La dewlete çirey samîmî nîya. Şarê kurdî bêşertî qala Birêz Ocalanî goştarî keno. Vengdayîşê Birêz Ocalanî hêvî û moral da şarî. Gerek verî heqê hêvî bêro caardene û azadîya fîzîkîye ya Rayber Apoyî bêro caardene. Eke Tirkîya wazena bibo hêzo xurt gerek kurdan dir bêro wêre.

Veysel Atli: Bi serran o ma mîyanê kaosî de yê. Prosesê çareserî hem semedê şarê herême hem zî semedê ma proseso pozîtîf o. Ma hinî pêkewtiş û şerî nêwazenê. Hetêkî ra qala haştîye kenê hetê bînî ra teyarayê şerî wirzenê we. Ma nê qebul nêkenê. Dewlete gerek durust bo. Yew rayberê kurdan est o, o zî Birêz Ocalan o. Birêz Ocalanî gamêke eşte, gerek dewlete zî game bierzo. Ma hinî şerî nêwazenê.

Mehmet Salih Kizil: Ma hinî qalkerdiş nê wazenê gamanê pêtan bivînê. Hetêkî qala haştîye yena kerdene hetê bînî ra teyarayê şarî nêvindenê. Ma senî eşkenê qala haştîye bikerê? Dewlete semedê haştîye qet gamêke nêerzena. Dewlete gerek game bierzo. Raber Apoyî çîyo ke kewt milê ci kerd. Gerek nika dewlete wezîfeyê xo bîyaro ca.

Haci Tanriverdi: Çewras serrî yo yew kîn û nefret est o, tesîrê ma perûne kerd. Ma hinî şerî nêaweznê. Bi mirnayîş çew nêeşkeno bireso cayêkî. Şer ma peyde beno. Ma zî paştî danê nê prosesî la problemo tewr gird no yo ke paşta ma dewlete ra pêt nîya.