Xebatê weçînayîş ê partîyanê sîyasîyan ewro qedîyeno û siba hemwelatijî do şorê sindoqan ser.  Vera hîleyan ê ke her weçînayîşî de yenê kerdene de Amedijî şinê serê sindoqan û rayanê xo rê do wayîr bivejîyê. Amedijan ard ziwan ke ê heşarê dep û dolabanê dewlete yê û vat, “Vera kesanê ke ma çin qebûl kenê ma do şorê serê sindoqan. Hewce bikero ma do sindoqan bipawê û rayanê xo rê wayîr bivejîyê.”

Seba ameyoxê domanan HDP

Hulya Kaya ya ke 33 serrî ya ard ziwan ke seba ameyoxê domananê xo a do şoro raya xo bida HDP’yî û vat, “Ez sey cinîyêk, seba heqê ma yê ke ma dest ra ameyê girewtene apey bigî do şora sindoqe ser. Ez do înan ê ke bajarê ma ma ra girewtê ra “Yê Ma Yo” vaja. Seba ke domanê mi bi kulturê xo, zereyê haştîye de biciwîyê ez do raya xo bida HDP’yî. Ma do şaredarîyan apey bigê.”

Ma heşarê ci yê

Karker Ozan Tanriverdî ard ziwan ke o zî raya xo dano HDP’yî û kayê ke yenê kaykerdene heşarê ci yê.  Tanriverdî reaksîyon da qiseyanê hukmatî yê ke seba şaredarîyanê HDP’yî vatibi “Ma do qeyûm tayîn bikerê” û vat, “Ma do rixmê tehdîtanê qeyûman şorê sindoqan. Eke ma nêşorê sindoqan kam şoro. Ez do raya xo bida HDP’yî. Eke dinya de ma teyna bimanê zî ma do reyna zî şorê sindoqe ser. “

Zextî êdî biqedîyê

Ramazan Alabalik zî qezaya Surî de xebatê rotişkarîya gêrokî keno.  Alabalikî ard ziwan ke o seba krîzo ke welat de roje bi roje beno xorîn û seba zextanê ke herême de yenê kerdene biqedîyê şino sindoqe ser û o do raya xo bido HDP’yî. Alabalikî vat, “Ez do seba ke gonîye nêrijo û haştîye bêra raya xo bida HDP’yî; çunke eke çi bikero HDP keno. Ez venga Erdoganî dana; tayê goştarîya nê welatî bikero. Êdî merdişî vinderê. “

Wa canî biciwîyê

Ozgur Tunçî zî bale ante serê grevê vêşanîye û vat, “Ma Amedij ê, HDP’yî ra teber raye nêdanê kesî. Sindoqe seba ma muhîm a. Pawitiş û hêvîyê ma yê girdê Mezopotamya ra estê. Her kes do bizano ke Kurdî şinê sindoqan ser. Ganî seba ke canî biciwîyê her kes şoro sindoqan ser û sindoqan rê wayîr bivejîyo. Ganî her kes ziwanê xo rê, welatê xo rê wayîr bivejîyo.

Ganî heme cinîyî şorê sindoqan ser

Bîrsen Kurtbogane zî ard ziwan ke seba apeygirewtişê şaredarîyan ê do 31’ Adare de serê sindoqan de bibê û vat, “Ma do seba apeygirewtişê şaredarîyê ma yê ke ameyê xespkerdene şorê sindoqan ser û raya xo bidê HDP’yî. Kesê ke xo ra vanê Kurd û nasnameyê xo pawenê ganî raya xo bidê HDP’yî. Seba apeygirewtişê rûmetanê ma, şaredarîyanê ma yê ke ma ra ameyê girewtene ganî heme cinîyî şorê sindoqan ser.

Her kes sindoqan rê wayîr bivejîyo

Hemwelatija bi nameyê Hanim Akbaba bale ante serê grevê vêşanîye û vat, “Ma do veng bi xo bidê. Eke ma ser bikewê, dinya vengê ma heşnena, seba naye zî ganî ma ser bikewê. Ma êdî nêwazenê dayîkî biberbê, ciwanî bimirê. Çîya ke yena kerdene bi rastî zalîmî ya. Seba naye zî ez do şora sindoqe. Her kes wa sindoqan rê wayîr bivejîyo.”