Endamê Konseya Rayberdişî ya KCK'yî Xebat Andokî, derheqê weçînitişê cayîyan o ke AKP-MHP bin kewtê de ANF’yî rê qisey kerd.

No weçînitiş nêbi, şer bi

Xebat Andokî ard ziwan ke no weçînitiş nêbi, şer bi û vat, “Bi rastî zî o yo ame viraştene weçînitiş nêbi, şer bi û hîna jî dewam keno. Her kes nika netîceyanê weçînitişî ercneno, la mîyan de weçînitiş çin o ke merdim rasta zî netîceyan biercno. Weçînitiş mîyanê şert û mercanê têduştan de yeno kerdene. Labelê tifaqa faşîst a Erdogan-Bahçelî heqê weçînitişê şarî dest ra girewt. Coka merdim nêeşkeno vajo ke weçînitiş û karê weçînitişî mîyanê şert û mercanê azadan de ameyê kerdene.

Andokî vat, “Erdogan-Bahçelî da zanayen ke no weçînitiş tarîxê komare de weçînitişo tewr krîtîk o û cehd kerd ke bi na propagandaye reyan bigê. Welat kerd rewşêka winasîye ke bi rastî no weçînitiş weçînitişê cayîyan ra teber bî rewşêka awankerdişê sîstemê îqtîdarî yê Tirkîya, têklîyê ci yê teberî, ekonomî, haştîye, haştîya cimatkî bi kilmî her çî bewlî kerd.”

AKP-MHP bin kewt

Xebat Andokî ard vîrî, serdestdarîya faşîst a AKP-MHP'yî kesî ra nêwedart ke bi kamcîn amancan tewrê weçînitişî bena û vat, “Waşt ke sîstemo faşîst o ke nameyê ci ‘sîstemê hukmatî yê serekkomarîye’ pa nayo û tu eleqeyê ci bi dînamîkanê cimatî çin o, wareyanê cayîyan de bidê awankerdene, şerê qirkerdişî yê vera Kurdan zî  Vakur, Rojawan, Başûr û her cayan ê ke Kurdî tede azad ê gird bikerê û bi nê hawayî rayî waştî. La weçînitiş de çîyo ke pawitene dest nêkewt û tifaqa AKP-MHP’yî nê weçinitişî de bin kewte.” 

Stratejîya HDP'yî îqtîdarî rê da vîndîkerdene

Andokî ard ziwan, bingeyê binkewtişê AKP-MHP’yî de stratejîya weçînitişî ya HDP’yî esto û vat, “Her kes zano ke teyna bi rayanê Tifaqê Miletî nê netîceyî dest nêkewtî. Ez qalê stratejîya HDP’yî kena ke bi hawayê ‘Newe ra apey girewtişê cayanê ke Kurdistanî ameybî xespkerdene û Tirkîya de zî binkewtişê AKP-MHP’yî’ ame namekerdene, netîceyê weçînitişan ê 31’ê Adare bewlî kerde.”

Tifaqê Kurdan ganî bêra girdkerdene

Andokî bale ante serê Tifaqê Kurdî yê ke HDP'yî Kurdistan de kerda û vat, “Şaredarîyê Hêne û Şaxî ameyî vîndîkerdene, Pîran û Çinar ameyî qezenckerdene. Tifaqê mîyanê partîyanê sîyasîyan a Kurdan tifagêko stratejîk o û teyna seba weçînitişî nîyo. Wareameyîşê nê tifaqî destkewteyanê srtatejîkan ra yew o.  Coka  munaqeşeyê ke nika ra pey do bêrê kerdene de ganî seba xurtkerdişê nê tifaqî bibê.  Ganî no tifaq hîratir bêro xurtkerdene û partîyê bîn ê ke teberê ci de mendê zî mîyan de ca bigîrê.”

Şirnex reyna Şirnex o, Şirnex reyna merkezê welatperwerîya Kurdan o

Andokî serê rewşa Şirnexî de zî qisey kerd û vat, “Şaş o ke merdim vajo nê cayan de weçînitiş ameyo kerdene û şarê ma bi hawayo azad rayê xo şuxulnayê. Vatişê “şarê ma yê welatperwerî tercîhê xo hetê kolonyalîstîye ra dayo’  nêzaketîyêka tam goreyê zerrîya rejîmê qirkerî ya. Çîyêko winasî çin o. Şirnex reyna Şirnex o. Şirnex reyna merkezê Kurdan ê xoverdayoxan o, merkezê welatperwerîya Kurdan o.”