Endamê Konseya Rayberdişî ya KCKyî Xebat Andokî ANFyî rê prosesê Komployê 9ê Teşrîna Verêne ercna. 

Qiseykerdişê Andokî ra tayê noqtayê girîngî wina yê:

''Tewr zaf Rayber Apoyî Komployo Mîyanneteweyî bi raştî ercna û eşkera kerd. Rayber Apo lîderê PKKyî û kurdan o. Yanî komplo vera kurdan û PKKyî zî amebi kerdene. Rayber Apoyî komplo sey 'komployê Gladioyî' ercnabi. Hêzanê kapîtalîstan serkêşîya Amerîka, Brîtanya û Îsraîlî de bi komployî kerd ke mudaxeleyê Rojhelatê Mîyanênî bikerê. Xora ê çaxî ra nata zî Şerê Dinya yo Hîrêyîn dewam keno. 

Wextê komployî de tayê kurdan zî ardimê komplogeran kerd. Xora nê ardimî ra Başûrê Kurdîstanî de parlamento ronîya. Hêzanê komplogeran seba plananê xo yê serê Rojhelatê Mîyanênî Rayber Apo û PKK sey astengî dîyî. Înan armanc kerd ke Rayber Apo îmha bikerê. 

Wextê Komployê 9ê Teşrîna Verêne de vera Sûrîye tedayêka pîle est bîye. Rayber Apoyî dî ke eke o Sûrîye ra nêvejîyo Sûrîye do bêra îşxalkerdene. Rayber Apoyî verê xo nêda koyan zî çunke hinî şer de rolê xo temam kerdbi. Ey seba çareserîya meseleya kurdan verê xo Ewropa. Çunke meseleya kurdan hetê welatanê Ewropa ra amebi viraştene. Hetê bînî ra Rayberîye zanayêne ke hêrişêko bîn ê vera ey do bibo sebebê şerêkê mendeyî. 

Yanî Rayberîye pêro planê komplogeran pûç kerdî. Rayber Apoyî xo ver da û kerd ke 2002 de cezaya îdamî zî bêra pûçkerdene.

Prosesê komployî yo verên îmhaya Rayberîye û oyo diyîn zî bêtesîrkerdişê îdeolojîya Rayber Apoyî bi. Rayber Apo o çax lîderê kurdan û PKKyî bi. La ewro o lîderê bindestan û şaran o. Yanî Rayber Apoyî prosesê komployî yo diyîn zî Îmrali de pûç kerd.Rayber Apoyî Îmrali de paradîgmaya xo ya Modernîteya Demokratîke pêşkêşê dinya kerde. Rayber Apo hucreyê yewkesî de tepişîyeno, binê îşkenceyî de yo. La ey nê şertî zî vurnayî firsendî.

Komplogeran waştêne ke Rayberîye bêtesîr bikerê la ewro bi mîlyonan merdimî Rayber Apoyî sey lîderê xo qebul kenê. Ewro şîarê 'Jin, Jiyan, Azadî' fekê pêro cinîyanê dinya de yo. 69 wayîrê Xelata Nobelî seba azadîya ey veng danê. Nê pêro serkewtişê Rayber Apoyî yê.

Naye ra pey ganî Rayber Apo bêro azadkerdene. Naye de rolê pîlî kewenê milê kurdan, cinîyan, bindestan û têgêrayîşê azadîye. Seba azadîya Rayber Apoyî ganî têkoşîn bêro pîlkerdene. Ganî ma vera hêzanê komplogeran tewirêkê xurtî bimojnê. Eke ma sey xoverdayîşê Îmraliyî teber de xo ver bidê eşkenê komployî bi temamî çin bikerê.''