Nuştox û rojnamegero kurd Musa Anter (Apê Musa) 29 serrî verî kuçeyê 442. yê taxa Cumhurîyetî yê qezaya Yenîşehîrî yê Amedî de amebi qetilkerdene. Apê Musa cayê qirkerdişî de ame yadkerdene.

Hemsereka DBPyî Salîha Aydenîz, Hemserekê HDPyî yê Amedî û îdarekarê ci, Hemserekê Komeleya Rojnamegeran a Dîcle Firatî (DFG), îdarekar û endamê MEBYA-DERî, TUHAY-DER, MED-DERî zî tede xeylêk kesî tewrê merasîmê yadkerdişî bîyî. Merasîm de fotografê şehîdanê çapemenîye ameyî berzkerdene.

Hemsereka DFGyî Dîcle Muftuoglu yadkerdiş de qisey kerd û vat: ''Feraseto ke 29 serrî verî o kiştbi waşt çapemenîya kurdan zî bêveng bikero. La ma ewro vînenê ke çapemenîya azade û çapemenîya kurdan nênê bêvengkerdene.''

Salîha Aydenîze zî ard ziwan ke 29 serrî nê 49 serrî zî bivîyarê ê do cînayetanê faîl-îmeçhulan xo vîr a nêkerê. Aydenîze vat: ''Ma zanenê ke kamyew feraset qirkerdişanê Efrîn û Silêmanî kerd. Ma soz danê Apê Musayî ke heta ke azadîye bivisnê destî têkoşînê xo rê dewam bikerê.''

Dima şar kuçeyê qirkerdişî de verê fotografê Anterî de qeranfîlî ronayî. Tîya de Hemserekê DFGyî Serdar Altanî eşkerayîyêke daye û vat: ''29 serrî zî bivîyarê embazê ma hê kişîyenê. Ma ewro musayê ke berzkerdişê fotografê Ferhat Tepeyî qedexe yo. Bi nê hawayî ê wazenê ma şehîdanê xo vîr a bikerê. La şehîdê ma yê çapemenîye rûmetê ma yê. Ma do rêçê înan ser o şorê.''

Beşdarî derbazê dewa Sitîlêlê ya Nisêbînî benê ke serê gorê ci de zî Musa Anter yad bikerê.