Artêşa tirke 23ê nîsane ra nata vera Herêmanê Pawitişî yê Medya hêrişê îşxalî kena. Gerîlayê Azadîye zî herêmanê Avaşîn, Zap û Metîna yê Herêmanê Pawitişî yê Medya de xoverdayîşê pîlî kenê. Nê xoverdayîşî de derbê pîlî yenê dayene artêşa tirke ya îşxalkere ro. Netîceya nê xoverdayîşî de pêlo destpêk ê têgêrayîşê îşxalî şikîya. Coka artêşa tirke neçare mende ke tay waranê Avaşînî ra xo apey bianca.

Artêşa tirke waştêne ke herêma Avaşînî gerîlayan bigêra binê ablûqa û çin bikera. Derbanê Avaşînî ra dima artêşa tirke Girê Konferansî û Girê Maran ra zî xo apey ant. Nê serebûtan ra dima 7ê hezîrane de artêşa tirke ya îşxalkere hêrişê tunelanê şerî yê Werxelê kerd. Xoverdayîşê 4 mengan ê gerîlayan ra dima psîkolojîya leşkeran ê tirkan zî xeripîyaye.

Xeylêk reyî çalakîyanê gerîlayan ra dima leşkeranê tirkan malzemeyê xo pey de verdayî û remayî. Dîmenêk de ke tunelanê şerî yê Werxelê ra vejîyayo zî no eşkera kerd. Dîmenan de malzeme û teqaberê ke gerîlayan dest nayo ser asenê.

Heman dîmenî de aseno ke nê malzeme û teqaberî aîdê kamyew leşkeran ê. Malzemeyê ke ameyê destvistene aîdê Tugayê 'Kaplanî' yê Tetwanî yo. Çîyo balkêş no yo ke leşkero ke 9ê êlule de waştêne teslîmê gerîlayan bibo la hetê yewinanê xo ra kişîyayo, nê tugayî de ca girewtêne. Merdimî nê serebûtan ra eşkenê fam bikerê ke psîkolojîya leşkeranê artêşa tirke senî xeripîyaya.