Ebdama Konseya Serekîya Pêroyî ya KCKyî Sozdare Avesta derheqê tecrîdê giranî yê vera Rayberê Şarê Kurdî Abdullah Ocalanî û serrgêra Fermanê 3yê Tebaxe yê Şingalî de ANFyî rê qisey kerd.

Qiseykerdişê Avesta ra tay noqtayê girîngî wina yê:

''28 mengî yo Rayber Apoyî ra xeberêke nêna girewtene. Teyna dewlete tirke ney pêro dewletê mîyanneteweyî mesuldarê nê tecrîdî yê. Ma eşnawit ke Rayber Apoyî rê reyna cezaya dîsîplînî ameya dayene. Seba ke dewleta tirke sûcê xo yê tecrîdkerdişî binimna nê cezayê dîsîplînî kerdê sîstematîk. Bi taybetî kombîyayîşê NATOyî ra dima na ceza dîyaye û hêrişê vera gerîlayan zî zêdîyayê. No yew konseptê şerî yo. Rayber Apoyî û PKKyî nêverda ke Peymana Lozanî ser bikewa. Rayber Apo 50 serrî yo bêmabên têkoşîn keno.  Sebebê tecrîdî yo bîn zî no yo. Kurdîstan de û dinya de paradîgmaya Rayber Apoyî her ke şina bena vila. Dişmen na paradîgma ra terseno. Dewleta tirke sîyasetêkê tehlukeyînî kena. La se kena wa bikera nêeşkena verê paradîgmaya Rayber Apoyî bigêra. 

Gerîlayê azadîye mîyanê xoverdayîşêkê pîlî de yê la şiknayîşê tecrîdî û azadkerdişê Rayber Apoyî teyna wezîfeyê gerîlayan nîyo wezîfeyê pêro merdimatîye yo. Ganî ma seba azadîya Rayber Apoyî bêmabên çalakîyan bikerê, hîna xurtî wayîrê Rayber Apoyî û gerîlayanê Kurdîstanî vejîyê. 

Gerîlayê ma 19 mengî yo vera hêrişanê giranan têkoşînêkê tûjî kenê. Vera gerîlayan dewleta tirke çekanê kîmyewîyan û bombayanê qedexekerdeyan şuxilnena. La dewletê mîyanneteweyî seba menfaetanê xo vengê xo dewleta tirke rê nêkenê. A raşte sebebê krîzê ekonomîkî no şer o. 

3yê tebaxa 2014î de cerganê DAÎŞî hêrişê Şingalî kerd û êzidîyî qetil kerdî. Gerîlayan xo resna hewarê şarê Şingalî û vera DAÎŞî xo ver da. Ez şexsê Egîd Civyan, Dilşêr Herekol, Hêlîn Mêrdîn, Nûjîn Sêrt, Genco Hewlêr, Evîn Dêrik, Dilgeş Rojhilat de pêro şehîdanê Şingalî bi rêzî yad kena. Şarê Şingalî bedelê giranî dayî. La hêrişê vera êzidîyan û Şingalî nêqedîyayê. Dewleta tirke bi destekê PDKyî tim Şingalî dana bombayan ver. Ganî hêzê mîyanneteweyî, dewleta Iraqî û rêxistinê mîyanneteweyî vera nê hêrişan tewirê xo bimojnê.

Hema zî dewleta tirke, hukmatê Iraqî û PDK kenê ke Peymana Şingalî ya 9ê Teşrîna Verêne bîyarê ca. Ganî Neteweyê Yewbîyayeyî vera na peymane tewirê xo bimojnê. Êzidîyî ganî yewîya xo û rêxistinîya xo awan bikerê. Ganî pêro kurdîstanijî zî paştî bidê şarê êzidîyan. Şarê Şingalî sey verî nîyo. 2014 ra nata Şingal de xoverdayîş û têkoşîn aver şinê. Ez venga pêro êzidîyanê ke kampan de manenê, dana ke wa abigêrê Şingalî. 

Şarê Şingalî hînî wayîrê sîstemê xo yê îdareyî û hêzanê xo yo. Tewr peyên KJKyî vera hêrişanê serê Şingal û Afganîstanî hemleyêke dabî destpêkerdene. Ez venga pêro êzidîyan, şarê Kurdîstanî û dostanê înan dana ke seba ke fermanê neweyî nêqewimîyê, tecrîd biqedo, seba azadîya Abdullah Ocalanî hîna zaf tewrê têkoşînî bibo.''