Endama Konseya Serekîye ya Pêroyî ya KCK’yî Sozdar Avesta beşdara bernameyê 'Rojeva Welat'î yê Stêrk Tvyî bîye û rojdem ercna:

"Xîretê seba yewîya neteweyîye, yewîya kurdan seba ke verê hêrişanê vera kurdan gênê girîng ê. Seserra 21. de bi ferasetêkê demokratîkî, bi felsefeyêka cuya azade awankerdişê yewîya kurdan raşt zî zaf girîng a. Têna no feraset eşkeno na seserre raşt biko. Na raştîyêk a. Ma sey têgêrayîşê azadîye wazenê eşkera bikê ke Rayber Apo seba naye kedêka pîle daye. Bi desan serr ê, zindanê Îmraliyî de binê tecrîdî de pêşnîyar û fikrî awan kerdî. Sey konferansêk yan zî platformêkê neteweyî û bi fikrê xo eşkera kerdî yewîya neteweyîye senî yena awankerdene. Neteweyê demokratîkî bi pêro beşanê xo, renganê xo şarî reyde ca girewt. Ganî vînayîşê pêro partîyan ê sîyasîyan yewbînan ra cîya bibê. La ganî na cîyaye nêba serek.Ma sey têgêrayîş wazenê vajê ke ma pê bawer ê ke têna beşêkê Kurdîstanî binê tehlûkeyî de nîyo. Ma heqê pêro kurdan pawenê. Ma wazenê ke aqilêkê hemparî awan bikê. Ma menfaatê pêroyî pîl bikê. Ma seba naye amade yê. Seserra 21. de hînî kurdî nêbê qurbanê dişmenan, komployan.

Babeta ma ya verêne azadîya Rayber Apoyî ya. Kampanya û hemleyê ma yê seba azadîya Rayber Apoyî mende yê. Ma komployê vera Serekîya ma bi hawayêkê eşkera vet meydan. No komplo têna bi azadîya Rayber Apoyî yeno wedaritene. Heta ke tecrîd dewam biko tesîrê ci zî teberî ra bêrê hîskerdene. Ma nê vînenê ke seba ke tecrîd giran bibo teberî ra zaf mudaxeleyî estê. Ma nêeşkenê derheqê Rayber Apoyî de xeberêke bigêra. Naye ra ganî her ca de têkoşîn bêro pîlkerdene û ganî bingeyê nê têkoşînî zî azadîya Ocalanî bibo. Têna yew rojdemê ma esto. O zî her ca de têkoşîn û xoverdayîş pîlkerdiş û dormeyê Rayber Apoyî de têkoşîn û xoverdayîş dewamkerdiş o. Ma na babete de israr kenê.

Xoîdarekerdiş heqê kurdan o. No têkoşîn 40 serran zî dewam biko ma reyna zî tira fek vera nêdanê. Sûr, Şirnex, Sîlopî, Cizîr û Nisêbîn de xoverdayîşo ke bi, şehadetê ke bîyî hema zî dewam kenê. Xoverdayîş qet nêno vînkerdene. O prosesêko bêhempa bi. Bi nê xoverdayîşî rûmetê kurdan ame pawitene. Kurdan bi nê hewa mojna ke ê do qet teslîmîyet qebul nêkê.

Qirkerdişê Tirl Rifatî yewna dore wahşetê faşîzmî mojna ra. Şarê kurdan verê cû zî bîyî şahîdê qirkerdişê dewleta tirke yê winasênî. No nîşanê faşîzmê Erdogan û Bahçelîyî yo. Ma nêzdîyê serrgêra Roboskî yê. Dewleta tirke uca de se kerdibî? Domanî zî tede 34 kesî qetil kerdî.

Qaşo peymana adirbirnayîşî ameye îmzakerdene. Vizêr reyna vera Eyn Îsa hêrişêk ame kerdene. Eke hêzê mîyanneteweyî wina dewam bikê benê hemparê dewleta tirke. Têna pê vatişan nêbeno. Tirkîya endama NATOyî ya. Ganî nê hêzî verê qirkerdişê dewleta tirke yê vera Rojawanî bigêrê.

Vera Şengalî 3 hêrişî ameyî kerdene. Armancê înan sey Osmanijan dişmenîya vera bawerîya êzidîyan a. Ê êzidîyan seba xo sey tehlûkeyêk vînenê. Nêwazenê ke yew komelo tabîî yê Kurdîstanî bibo. Eke pê qirkerdişan nêeşkê nê şaran çin bikê, na rey înan danê koçkerdene.

Gerîlayanê HPGyî û YJA-Starî serrêka xoverdayîşêkê pîlî temam kerde. Seraser pêro Kurdîstan de û Herêmanê Pawitişî yê Medya de destkewteyê xo pawitî. Gerîlayan estbîyayîşê xo bi hawayêkê xurtî mojna ra. Pêro dinya dî ke gerîlayî bin nêkewenê. Garantîyê pêro serkewteyan gerîlayê azadîye yê. Tewr zaf zî înan ra tersenê."