23yê kanûna 2022yî de paytextê Fransa Paris de vera Merkezê Kulturê Kurdan ê Ahmet Kayayî hêriş ame kerdene û hêriş de Endama Konseya Rayberdişî ya KCKyî Emîne Kara (Evîne Goyî), Endamê Têgêrayîşê Kulturê Kurdan Mîr Perwer (Mehmet Şîrîn Aydin) û welatperwer Abdurrahman Kizil ameyî qetilkerdene.

Kiştox Willam Maleto 69 serre sûcanê 'qestî ra kiştişê nijadêkî, xîretê cînayetî û peydakerdişê çeke' ra tepişîya. Avûkatê Komelê Demokratîkî yê Kurdan ê Fransa (CDK-F) David Andicî derheqê Qirkerdişê Parisî yê 23yê Kanûne de ANFyî rê qisey kerd.

Andicî ard ziwan ke no hêriş sey 'suîkastî' eşkeno pênase bibo û vat: ''Ganî nê hêrişî de nîyetê kiştoxî pêro perskerdene. Yew merdim eşkeno bi sereyê xo hêrişê terorî bikero, hewce nêkeno ke peyê ci de komelêk yan zî dewletêke est ba. Çîyo ke ma tira fam nêkerd no yo ke Dozgerîya Antî-Terorî ya Neteweyîye (PNAT) çira tehqîqat nêdayo destpêkerdene. PNATî wexto ke ciwananê kurdan  verê Sersefîrîya Tirkîya de çalakîye kerdbî cade tehqîqat dabi destpêkerdene. Rixmo ke vera CDK-Fyî xeylêk xîretê suîkastî est ê derheqê nînan de bi karakterê 'terorî' tehqîqat nêame kerdene.  Wexto ke vera menfaetanê Tirkîya hêrişî yenê kerdene PNAT cade keweno dewre la seba kurdan wina tênêgêreno.''

Andicî vist vîrî ke kiştox Malet seba ke xo sey nêweşî bimojno her çî keno û vat: ''Yeno xîretkerdene ke merdimî pê bawer bikerê ke nê mêrikî nêweşîye ra hêriş kerdo. Hetê bînî ra ma hema nêeşkayî xo biresnê dosya. Mîsal nêzanîyeno ke no mêrik wexto ke hêrişî ra verî zîndan ra vejîyabi se kerdo. Taxa hêrişî de bi desan dikanê kurdan est ê, heta na taxe rê 'Kurdîstano Qij' vajîyeno. Hêrişkerî hêrişê cayê bînî ney raşteraşt hêrişê tîya kerdo. Hîrê kurdî înfaz kerdî.''

Andicî îfade kerd ke Fransa de raştgîrê şîdetî qetî hêrişê kurdan nêkenê û kurdan sey dişmenî zî nêvînenê. Andicî vat: ''Hêrişê 23yê Kanûne hêrişêkê terorî yo ke bi plan û profesyonelî ameyo kerdene. Ma tersenê ke delîlî werte ra bêrê wedaritene. Ma wazenê PNAT tehqîqatê nê serebûtî bikero.''