Gerîlayê HPGyî Bijî Amed (Harun Kardaş) şerê vera dewleta tirke de herêma Licê ya Amedî de şehîd bibi. 

Gerîlaya YJA-Starî Bijîye Stêrk Ameda ke şehîd Amedî reyde heman warî de têkoşîn kerdêne ANFyî rê qalê şehîdî kerd.

Bijîye Stêrk vat: ''14ê nîsana 2020î de dişmen warê Apê Mûsayî girewtbi binê ablûqa. Dişmen bi 3 skorskyan serê ma ra gêrayêne. Embazan waşt ke ma herême ra vejîyê. O çax ez 15 serre bîya. Coka embaz Bijîyî ez nêberda warê operasyonî û vat ke eke çîyêk bêro înan ser ez do xebere bida embazan. A roje mi hîs kerd ke ez do hinî embaz Bijîyî nêvîna. Embaz Bijîyî şer de şehîd bi. 

Wexto ke ez şîya ser pirdî dişmenî ez tepişta. Leşkeran ez erdî ra kaş kerda, fermandarê înan zî heqaretê mi, Rayberîye û embazan kerd. Înan uca de mi rê zaf îşkence kerd. Mi uca de dî ke embaz Bijî şehîd bîyo. Dişmenî verê çimanê mi de cenazaya ey rê zî îşkence kerdêne. Hiş sereyê mi ra şibi. Wexto ke ez hişyar bîya bedenê mi ra gonîye ameyêne, destê mi kelemçekerde bîyî û ez erd de bîya. Înan seba ke çapemenîye dîmen nêgêra kelemçeyî mi destî ra vetî û ez verdaya. La dima kesêkî derheqê mi de agahîye daya ldişmenî. Mi fam kerd ke ez do bitepişîya. Coka ez şîya cayêke mi xo nimna la uca de zî embazî çin bîyê. Axir di mengan ra dima mi xo resna embazan.

Şehadetê embaz Bijîyî ra ver ez gerîla nêbîya. La dişmen rixmo ke ez domana 15 serre bîya hem mi rê hem zî verê çimanê mi de cenazaya gerîlayan rê îşkence kerd. Ez bi ney hêrs bîya û tewra  gerîlayan bîya. Seba ke layîqê ey biba mi nameyê embaz Bijî Amedî girewt. Mi embaz Bijî domanîya xo ra nata şinasnayêne. O 2015 de tewrê gerîlayan bibi. Wexto ke ez doman bîya embaz Bijîyî ez girewtêne milanê xo ser û berdêne çalakîyanê Licê. Embaz Bijîyî her kesî rê bi kesayetê xo tesîr kerdêne. Rîyê ey tim huyayêne. Ey şarê xo û embazanê xo ra zaf hes kerdêne. Embaz Bijî heta şehadetê xo pêro waranê Amedî ra gêra. Xeyalê ey o tewr pîl zî o bi ke rojêke o do bieşko Amed de Rayber Apoyî bivîno.''