Endama Koordînasyonê PAJKî Medya Haber TV de cewab da persanê Arjîne Baysal.

Aytene Dêrsim qiseykerdişê xo de verî şexsê Dîyar Xerîb (Helmet, Salîh Cîzre, Dr. Huseyîn, Leyla Agirî û Zîlane (Zeynepe Kinaci) de pêro şehîdê menga hezîrane yad kerdî û vat: ''Embaze Zîlane seba ke verê komployê serê Rayberîye bigêrê û taktîkê neweyî bêrê caardene çalakîya xo kerde. Aye bi sereyê xo artêşêke tarûmar kerde. Çalakîya aye mojna ke dişmen nêeşkeno cinîya kurde, şarê kurdî û milîtananê ma çin bikero.''

Aytene Dêrsim îfade kerd ke îqtîdaro faşîst ê AKP-MHPyî ewro Zagrosan de teng bîyo û ho wextê xo yê peyênî de yo coka hêrişê Şingal, Rojawan, Mexmûr û Başûrê Kurdîstanî keno. Aytene Dêrsim vat: ''PKKyî roja verêne ra nata bawerîya azadîya şarê kurdî awan kerde. Ewro na bawerîye zîl dana. Raştîya Zîlane hînî pratîk de asena. Erkê ma yo ke Herêmanê Pawitişî yê Medya de tewrê xoverdayîşî yê gerîlayanê ke na bawerîye zîl kerde, bibê. Nê koyî koyê ma yê; ma domanê nê koyan ê. Mumkîn nîyo ke dewleta tirke Zagrosan de bimana.''

Aytene Dêrsim dîmenê ke Gerîla TVyî weşanayî vistî vîrî û pare kerd ke leşkerê tirkî bêarmenc û bêîdeolojî têgêrenê. Aytene Dêrsim bale ante ser ke ganî pêro şarê kurdî bi ruhê seferberî tewrê hemleya şorişgêre ya têgêrayîşê azadîye bibo û vat: ''Pêro şarê kurdî ganî bi ruhê seferberî tewrê hemleya şorişgêre bibo. Şarê kurdî ganî xoverdayîşê gerîlayan ra îlham bigêro. Ganî ma azadîye garantî bikerê û şerî pêro şaristanan rê vila bikerê. Perwerîya Zîlane, Zîlanbîyayîş û xeta Zîlane de şîyayîş bi nê hawayî mumkîn o.''

Endama Koordînasyonê PAJKî Aytene Dêrsim şehîdê hezîrane Fîlîze Yerlîkaya (Gulane) û Sema Yuce (Serhildane) yad kerdî û vat: ''Embaze Gulane xo xeta embaze Zîlane de perwerde kerdbî. A wayîra tewirêkê milîtanî bîye. Wexto ke xeta xayîne û tasfîyekar embaze Gulane hedef kerdbî a raşte xeta Zîlane hedef kerdbî. Embaze Sema vatbî 'Ez wazena mabênê 8ê adare û 21ê Adare de biba pirdêk' û bi nê hawayî aye ferman da ma ke ma îdeolojîya azadîya cinîyan a Rayberîye bîyarê ca.''

Aytene Dêrsim embaza xo ya têkoşînî Leyla Agirî serrgêra hîrêyîne ya şehadetê ci de yad kerde û vat: ''Embaze Leyla xeylêk waran de têkoşîn kerd, fermandarîya YJA-Starî kerde, xebatanê verênan ê Jineolojî de ca girewt. Mîyanê têkoşînê cinîyan de tewirê aye zaf zelal bi. A embazêka winasêne bîye ke mîyanê têkoşînê cinîyan de têkoşînê xo yê zereyî zî bi hawayêkê xorinî kerdêne.''

Aytene Dêrsim peynîya roportajê xo de bale ante hemkarî û xayînîya PDKyî ser û dîyar kerd ke ganî vera xeta îxanetî xeta xoverdayîş û têkoşînî sey esas bêra girewtene. Aytene Dêrsim da zanayene ke kesê ke dewleta tirke û PDKyî rê hetkarîye kenê, îstîxbarat danê do hesab bidê û xeta îxanetî qetî do ser nêkewa.