Goreyê Komela Heqanê Merdiman (ÎHD) ê Beşê Amedî nîmeyê ewilênî yê  serre de tewr tay 5 reyî gor/goristanî ameyî raşanayene. Yewna nîmuneyê nê wehşetê AKPyî tu cayê dinya de çinyo. Şertanê tewr giranan ê şerrî de zî çewî nêard xo heş ke hêrişê cenaze yan zî goristananê hêzanê dişmenî bikero.    

Tayê bicaardişê teberê merdimayî yê AKPyî nê yê:

Goristanê Yenîkoyî yê Amedî de 23, Riha de 27, Elezîz de 1, Dîlok de 7, Cizîre de 33, Silopî de 17, Şirnex de 42, Erzirom de 54, Trabzon de 6, Wan de 6, Sêrt de 10, Bedlîs de 25 û Malatya de zî 50 cenazeyî ameyî vindarnayene. Pêro pîya 301 cenazeyî zî Hezîrane de ameyî berdene bi goristananê „bêkesan“.

Ramazan Ateşo ke Vakurê Sûrîye de şerrê hemverê DAÎŞî de cuya xo vindî kerdebî û Misircê Sêrtî de amebi defnkerdene, seva testê DNAyî cenazaya ci bi fermanê dozgerîye amî vetene û testî ra dima ancî keyeyê ci rê amî teslîmkerdene.

Goristanê Yenîkoyî yê Amedî de gorê gerîlayanê HPG û YPG/YPJyîyan ser o hêrişî ameyî kerdene. Fotografê ke serê goran de bî ameyî xêzkerdene û bi spreyê sîyayî ameyî boyaxkerdene.

Goristanê Asrî yê qezaya Gîhadînî yê Agirî de cayo ke gorê gerîlayan tede estbî ser o hêriş virazîya, berkoleyê goran ameyî şiktene.

Qezaya Bedlîsî Tûx (Tatwan) de zî gorê gerîlayan ê ke Goristanê Karşiyaka de bîyî ameyî tehrîbkerdene.

Goristano ke Mehlaya Ormanî ya qezaya Geverî ya Colemêrgî de bi hetê tîmanê taybetîyan ê tirkan ra reya 5. ame tehrîbkerdene.

Tayê goristananê qezaya Bismilî yê Amedî de zî heme berkoleyê goranê endamanê HPG, YPG, YPJ, YPS, YPS-JIN û YJA-STARî hetê polîsê tirkî ra ameyî vurnayene.

Dewa Oleka Jorî ya Bedlîsî de Goristanê Garzanî ra 267 cenazeyî ameyî vetene, bê hayîya keyeyê înan ameyî şirawitene bi Sazîya Tibî ya Edlîyî ya Stenbolî. 

Goristanê Şehîdan ê Îsmaîl Ronahî ke dewa Kolan a qezaya Gimgimî ya Mûşî de bi hetê leşkeranê tirkî ra bi makîneyanê karî bi temamî ame raşanayene. 

350 cenazeyê ke şeklê înan xerepîyabi ameyî ardene bi Sazîya Tibê Edlîyî yê Malatya. Cenazeyî gorsitanê bêkesan de ameyî defnkerdene.

Goreyê hayîdarîya Komela Paştîdayîşî ya Keyeyanê ke Merdimê Xo Vindî Kerdê ya Mezopotamya 314 cenazeyî nêdîyayî keyeyanê înan û goristananê bêkesan de ameyî defnkerdene.  

Mudahaleyê hemverê cenazeyan ê AKPyî hem teberê huqûqê mîyan-neteweyî de yo hem zî yê Tirkîye de yo. Mewzuato ke Tirkîye de yo bi hûmara 1593 yê Qanûnê Hifzisihha yê Umûmîyî ame bewlîkerdene; nê qanûnî de cenazeyî do senî bêrê defnkerdene bi eşkerayî ameyo bewlîkerdene.   

Kurdan hêrişê AKPyî yê hemverê ercanê înan û cenazeyanê înan bêcewab nêverdayî. Dewanê Goristanê Garzanî û Goristanê Îsmaîl Ronahî yê Gimgimî de sindoqan de HDP bî partîya yewine.