Qezaya Meramî ya Konya de 7 ferdê keyeyê Dedeogullariyî ameybî qetilkerdene. Qirkerdişî ra dima endamanê Komîsyonê Ziwanê Kurdkî yê Baroyê Amedî seba protestokerdişê qirkerdişî verê Salona Konferansî ya Tahîr Elçîyî de qasê rojêke nobeta edaletî dabî destpêkerdene. Endamanê baroyî pê eşkerayîyêke çalakîya xo qedînaye û da zanayene ke ê do dewa teqîb bikerê.

Nameyê Komîsyonî ser o Avûkat Eyup Aydenîzî qisey kerd û pare kerd ke ê nê hêrişê nîjadprestî yê Konya şermezar kenê. Aydenîzî vat: ''Ma venga rayaumûmîye danê ke ma nê hêrişan qebul nêkenê. No hêriş munferîd nîyo, destpêk o. Şarê ma bêwayîr bîyo.''

Avûkat Emîn Gokdemîrî zî vat: ''Nê 7 kesî semedo ke kurd bîyî kişîyayî. Ma wazenê ke wa kes semedê ziwan û nasnameyê xo maruzê hêrişan nêmano. Ma venga hukmatî û dozgerîye danê ke seba cezakerdişê sûcdaran cade têbigêro. Wa hînî kurdî maruzê hêrişan nêmanê. Sereyê ma pêroyînan weş bo.''