Dawetê Dadgeha Berze yê merasîmê akerdişî yê serra edlî yo ke do Beştepe de bêro viraştne hetê xeylê baroyanê Kurdistan û Tirkîya ra ame redkerdene. Baroyê Mûşî zî da zanayene ke ê do tewrê nê dawetê mebê.

Serekê Baroyê Mûşî A. Bakî Çelebî serê adresê baro yê medyaya sosyale ra da pêhesnayene ke ê zî nê dawetî red kenê û nê vatî: ‘’Merasîmê akerdişî binê kontrolê serokkomarî de Qesrê Beştepe de yeno viraştene. Reyna heqê merdiman nênê pawitene, edalet binê fermanê îqtîdarê sîyasîyî de yo, bi  hezaran kesî bîlasebeb tepişteyî û bi hezaran kesî bîlaheq karê înan ra ameyî eştene. Coka binê  nê şertan ma tewrê nê dawetî nêbenê.’’

Baroyanê  Mûgla, Antalya, Enqere, Aydin, Wan, Ordû, Bûrsa, Îzmir, Stenbol, Mêrsîn, Eskîşehîr, Balikesîr, Hatay, Duzce, Kocaelî, Kirklarelî, Amasya, Denîzlî, Edene  û Riha dawet red kerdbi. Yeno pawitene ke do xeylî baroyê bînî zî dawetî red bikerê.