Endamê Tîmanê Înşayê Haştîye yê Amerîka (CPT) Kameran Osmanî da zanayene ke Başûrê Kurdîstanî de hîrê dewê bînî ameyî vengkerdene.

Osmanî derheqê hêrişê herêma Dînartê  nê vatî: ''Bombardumanê bi droneyanê çekdaran û çekanê giranan ra yeno famkerdene îhtîmalê operasyonê leşkerî yê neweyî est o. Rîyê hêrişanê dewleta tirke ra dewanê Nepaxî, Bêr Kekurê  Kafya de yê ke dormeyê Koyê Garê yê herêma Zêbarî de yê, sîvîlan banê xo caverdayî û verê xo da Dînartê û Akrê.''

Kameran Osmanî da zanayene ke 4ê sibate de selahîyetdaranê asayîşî yê Akrê şarê nê hîrê dewan hîşyar kerd  ke wa dewanê xo veng bikerî û vat: ''Selahîyetdaran dewijan ra vat 'eke şima dewanê xo veng mekerê, şima do cuyeya xo ra bibê berpirsîyar.' Na rewşe herême de falîyetanê citkarî û heywankarîye yê dewijan xirab kena.''

Kameran Osmanî vat rîyê operasyonanê leşkerî yê dewleta tirke ya îşxalkere yê vera Herêma Kurdîstanî ra  heta nika 183 dewî bi temamî ameyî vengkerdene, 602 dewî zî binê rîskê vengkerdişî de yê û nizdê 400 dewan de zî hinî roniştiş mumkun nîyo.