Dewleta tirke kesê ke zulmê ci ra Vakurê Kurdîstanî ra ravêrtî Başûrê Kurdîstanî înan tehdît kena ke ci rê ajanîye bikerê. M.S.  yo şirnekij û K. D. yo sêrtij yê ke seba ke ajanîye bikerî ameyî tehdîtkerdene derheqê babete de qisey kerd.

M. S. yo ke derheqê ey de heta 15 serran ceza esta nê vatî :  ''23ê terşîna peyêna 2019î de mi rê telefonê bi nê (05061154728) numarayî ra mesajk ame. Mi ra ame vatene ke o kesêko payeberz ê dewlete yo û Anqara ra gêrêno û waşt ke ez înan rê ajanîye bikerê. Vat eke ti ajanîye bikerê ma to rê madî û manevî hetkarîye kenê la eke ti qebûl mekerê ma keyeyê to nas kenê ma zirar danê înan. Mi ra waşt ke ez derheqê kadroyanê PKKyî de çi vînî û bieşnawî înan ra vajî. Mi waştişê înan qebûl nêkerd. Mi rê vat 28 yewinê MÎTî Başûr de estî ajanê înan tîya zaf ê. Eke ez înan de bixewtî ê do mi bi kesanê bînan bidê naskerdene. Reyna vat eke ti qebûl bikerî ma do dewaya to zî bide war û ti  cuyêka rehete biciwîye. Gama ke mi vat ez qetîyen çîyêko winayên qebûl nêkena înan mi tehdît kerd vat ma do zirar bidê keyeyê to û destûr medê ke ti Başûr de zî bimanê. Ganî şarê ma yo welatperwer vera ajankerdişî aye bo.‘‘

K. D. yo wayîrê 5 domanan o ke cîya cîya dewayan ra bîlasebeb bi serran caze girewta û aye ra şîyo Başûr ey zî nê vatî: ''10ê kanûna 2019î de telefonê mi rê mesajêk ame. Mi rê vat ez Anqara ra gêrana mi numarayê to embazêkê to yê Başûrî ra girewt û waşt ke ez înan rê ajanîye bikerê. Verî mi guweş pa nêkuwa, mi vat qey kesêk mi de yarî keno. Mesajê bînan de numarayê dosyaya mi nuşt. Mi hînî zana ke raşta zî MÎTî ra yo. Vat eke ti ajanîye qebûl bikerî ma do dosyaya ti werte ra wedarê, ti eşkenî rehet agêrî  cayê keyeyê xo. Reyna vat ma hetkarîya madîye zî kenê û mi bi endamanê bînan ê MÎTî yê ke Başûr de yê danê naskerdene. Eke ti qebûl mekerî  ma zirar danê keyeyê to. Rixmê naye mi qebûl nêkerd. Mi bêanorîye û bêehleqîye qebûl nêkerd. Ganî qet kurdêk naye qebul nêkero.‘‘