Grevê Hewlêrî roja 179 ‘ine de, Silêmanî roja 156‘ine de, Kelarî roja 84‘ine de, Mexmûrî zî roja 154‘ine de û rojeyê mergî yê Merwan Menduh Ozdemîre zî roja 5’ine de bi qerardarîye dewam kenê.

Hewlêr

Grevê vêşanîye yê bêdem û biagêraşî yo ke Temsîlkarîya HDP’yî ya Hewlêrî de vera tecrîdê serê Rayberê Şarê Kurdî Abdullah Ocalanî ameyo destpêkerdene, roja 178’ine de dewam keno. Çalakîya grevê vêşanîye hetê gruba 90’ine ra dewam kena.

Çalakîya endamê Meclîsê HDP'yî yê Hewlêrî Nasir Yagizî  zî roja 179’ine de bi qerardarîye dewam kena.

Silêmanî

Grevê vêşanîye yo ke Komela Karkeran a Mezopotamya ya Silêmanî de vera tecrîdî serê Rayberê Şarê Kurdî Abdullah Ocalanî amebi destpêkerdene, roja 156'ine de bi gruba 78’ine dewam keno.

Çalakîya Muhendis Herêm Mehmûdî ya ke qezaya Kelarî ya Germîyanî de zî roja 88’ine de bi qerardarîye dewam kena.

Ciwanê  Vakurê Kurdistanî Merwan Memduh Ozdemîr Komela Karkeran a Mezopotamya ya Silêmanî de 14'ê Gulane de vera tecrîdê Ocalanî dest bi rojeyê mergî kerdibi. Xoverdayîşê Ozdemîrî roja 5’ine de dewam keno.

Mexmûr

Çalakîya grevê vêşanîye ya bêdem û bêagêrayîşî ya Kampa Multecîyan a Şehîd Rûstem Cûdî ya Mexmûrî zî bi koma 52’ine roja 154’ine de dewam kena.

Hetê bînî ra grevê vêşanîye yê bêdem û bêagêrayîşî yê endama Koordînasyonê Meclîsê Îştarî Fedîle Toke zî roja 119’ine de bi qerardarîye dewam keno.