Başûrê Kurdistanî de tewirê verba hêrişê îşxalkarîye

Başûrê Kurdistanî de xeylî îdarekaran, 127 roşnvîran û nuştoxan veng da NY'yî ke verba hêrişê Tirkî yê îşxalkarî vindere.

Verba amadeyîya îşxalî ya dewleta Tirkî ya serê Vakur û Rojakewtena Sûrîye tewirî dewam kenê. Hem selahîyetdaranê Başûrê Kurdistanî û hem zî komeleya sivîle tewirê xo mojna.

Endamê Komîteya Merkezî yê YNK'yî Şêx Cengî Talabanîyî qerarê peyserancîyayîşê leşkeranê Amerîka yê serê sînoranê Tirkîya û Rojawanî vat, no do bi xo krîz û şer ano, no krîz û şer do sînorê Sûrîye de nêmano, derbasê Iraqî zî bibo û bike ke reyna DAÎŞ ganî bibo, tê bigêro û vat: "Nê krîzî ra do Koalîsyonê Mîyanneteweyî berpirsîyar bibo." Serekê Pêroyî yê PDK'yî Mesûd Barzanî zî serê hesabê xo yê twîtterî de vat, "Ez xîret bikerî ke Kurdê Rojawanî dejêko pîlêr nêancê." Serekê Dîwanê Serekîye yê Herêma Kurdistanî Nêçirvan Barzanî zî pêvînayîşê Lavrovî reyde nêrazîbîyayîşê xo parbe kerd û waşt ke Rusya û Lavrov seba haştîye mabeynkarîye bikê. Serekê Merkezî yê Karanê Teberî yê Herêma Kurdistanî Sefîn Dîzayîyî vat ke eke dewleta Tirkî hêriş Rojawanî rê bikê, qurbanîyê verênî do sivîlî bibê. Hukmatê Herêma Kurdistanî Sêşeme nêrazîbîyayîşê xo yê hêrişî parbe kerd û vat: "Ma razî nîyê ke hêzê DYA bêrê peyseracîyayene û dima dewleta Tirkî hêrişê ci bike."

Nuştox, roşnvîr, hunermend û şexsîyetanê sîyasî verba amadekarîya îşxalkarî ya Tirkî serê Vakur û Rojakewtena Surîye rê tewirê xo mojna. Eşkerayîyêka bi îmzaya 127 kesan veng NY'yî rê kerd ke verê îşxalî û qirkerdişî vinderê. Eşkerayîye de ame vatene ke "Ma wazenê nêro destûrdayene ke gonî birişe, qirkerdiş bêro kerdene, herêmanê asayîşênan de şer biveje. Ma seba na babete veng danê şima ke şima wezîfeyê xo bikê."