Fermandarîya Merkezî ya YJA-Starî ra Batûfa Çekdar derheqê şerê gerîlayanê Vakurê Kurdîstanî de ANFyî rê qisey kerd.

Qiseykerdişê Batûfa Çekdar ra tayê noqtayê girîngî wina yê:

''Rayber Apoyî 52 serrî verî Vakur de dest pê têkoşînê azadîye kerd. Her cayê Vakurî vurîya cepheyê têkoşînî. Xoverdayîşê gerîlayan ê Vakurê Kurdîstanî bi taybetî 8 serranê peyênan de şahîdîya prosesê neweyî keno. Vakur de bêmabên şer yeno kerdene. Hêzê hegemonîkî nê hêrişanê dewleta tirke çin hesibnenê. Çunke nê hêzî zî wazenê ke verê Rayber Apoyî û PKKyî bêro girewtene. Nê hêzan hêverî gerîlayê Vakurî kerdî hedef. 

Warê Vakurî warê şerê fedayîyan o. Dişmen seba ke warê Vakurî bê gerîlayan bikero operasyonê îşxalî kerdî. Erdoganê faşîstî çend rojî verî vat ke 38 hezar operasyonî Vakur de ameyê kerdene. Dişmen rixmê teyarayanê keşfî û ajananê xo zî nêeşkeno koy û wareyanê Kurdîstanî de serwer bibo.

Dewleta tirke bi rayîrê ajan û xayînan xîret kena ke tengbîyayîşê xo çareser bikera. Kontrayî Vakurê Kurdîstanî de game bi game gêrenê gerîlayan. Heyf ke na rewşe welatê ma de tekrarê îxanetî yo. Vera hêrişanê barbaran ê dewleta tirke gerîlayî her cayê Vakurê Kurdîstanî de xo ver danê. Nê 38 hezar operasyonan de gerîlayan bedelê giranî dayî. Bi na wesîle ez şehîdanê ma yad kena. 

Bêguman teyna 2024 de nê, mîyanê 8 serranê peyênan de, şerê rûmet û xoverdayîşî yê Vakurê Kurdîstanî de xeylêk fermandarê efsanewîyî şehîd bîyî. Embazanê ma yê şehîdan Delal, Berçem, Azad, Şevîn, Leyla, Yilmaz, Axîn, Berwar, Şêxmûs, Hewraman, Rizgar, Azê, Medya, Diljîn, Rojbîn û Egîd Civyanî xoverdayîşêko bêhempa kerd. Dêrsimî ra heta Serhedî, Botanî ra heta Amedî, Xerzanî, Erziromî ûsn şerêko pîl yeno kerdene. Gerîlayî koyan de têkoşînêkê bêemanî kenê. La Şerê Şarî yo Şorişgêr zî ganî xurtêr bibo. Ganî şar û gerîlayî hêzê xo bikerê yew û her ca bikerê warê xoverdayîşî.''