Cografyaya Kurdistanî ya ke bi bereketê xo dinya de namdar a,  rîyê polîtîkayanê şerî yê dewleta Tirkî ra bêberdar mende. Nê dewan ra yewa ke rîyê bêwayîrîye ra bax û baxçeyê ci bîyê wişkî, meyweyê hinarî, încîrî û xeylê meyweyê bînî yê daran bîyê wişkî zî dewa Hîzûwê ya Hesenkefî ya Êlihî ya. Bax û baxçeyê Kurdistanijanê ke ferzkerdişê qorîcîyîya dewleta Tirkî qebûl nêkerda û dewê xo teriknayê de rîyê bêwayîrîye ra bî wişkî.

Dewijêk ke rîyê asayîşî ra nêwaşt nameyê xo bido, vat, dewa Hîzûwê de verê cû her kes pîya ciwîyayêne û paşte dayêne yewbînî, la dimayê sîstemê qorîcîtîye xeylê dewijî mecbûr mendî ke  erdê xo ca biverdê. Hemwelatijî vat, “Ez domanîya xo ra nata tîya ya û mi qet erdê xo ca nêverda.” Hemwelatijî vat, rixmê zext û zordarîya zî înan qorîcîtîye qebûl nêkerda.

Hemwelatijo ke nameyê xo nêda vat, bax û baxçeyê dewijanê ke rîyê zext û zordarîya dewlete ra ameyê teriknayene bî wişk û ziwa, rîyê bêawî ra ê xeylî beran nêeşkenê weye bikerê û vat, “Ma nê rezê ke şima vînenê, înan ra bi tonan engure arê dayêne û ci ra dims û bastîq viraştêne. Nika teyna rezêk o. Încîrê ma, hinarê ma û çîyê ke ma debarê xo pê kerdêne rîyê bêwayîrîye ra bî wişkî.” Hemwelatijî vengdayîş bi dewijanê ke dewe teriknaya kerd ke wa apey agêrê dewa xo û bax û baxçeyanê xo ra wayîr bivejîyê.