Hemserekê Konseya Rayberdişî ya KCKyî Cemil Bayikî Programêkê Taybetî yê Stêrk TVyî de rojdem erjna. Qiseykerdişê Bayikî qismêko kilm wina yo:

''Badê çar serran Rayber Apoyî keyeyê xo reyde pêvînayîş kerd. Rayber Apoyî ra selam û xebergirewtiş muhîm o la çend rojî dima ra reyna ezaya pêvînayîşî ameye dayene. Nîyetê dewleta tirke yê çareserkerdişê meseleya kurdan çîn o. Eke ê raşta wazenê mesele bêra çareserkerdene badê pêvînayîşî cede cezaya qedexekerdişê pêvînayîşî nêdayêne.

Têna ceza zî nêdaye, hêrişê Rojawanî kerd; Tirkîya û Vakur de şeradarîyî xesp kerdî. Dewleta tirke nika krîzêk de ya. Hem têkoşîno ke yeno rayraberdene hem zî averşîyayîşê Rojhelatê Mîyanênî dewleta tirke de krîz afirnenî. Bi tay eşkerayîyan kena ke krîzî ra vejîyo la no mumkun nîyo. Eke dewleta tirke mîyanê wina tengayîya girde de nêbîyêne rojdemo winayên nêafirnayêne. Çîyo ke ganî ma bikerê şiknayîşê tecrîdî û caardişê azadîya fîzîkîye ya Rayber Apoyî ya. Azadîya fîzîkîye ya Rayber Apoyî rayîrê çareserkerdişê meseleya kurdan akena; teberê nê de mumkun nîyo.''

Bayikî bi qeyûman xespkerdişê şaredarîyanê Esenyurt, Mêrdîn, Xelfetî û Êlihî sey îşxalî name kerd û vat: ''Şarê kurdî heme destkewteyê xo bi xoverdayîş, têkoşîn û bedelanê girdan fînayî dest. Şar ganî wayîrê destketeyanê xo, şaredarîyan, erjan, kede û ameyoxê xo vejîyo.''

Bayikî derheqê vîjnayîşanê Başûrî de zî wina vat: ''Barzanîyî bizanayîşî hukmatî nênanê ro ke wext qezenc bikerê. ''Cemil Bayikî vat ganî hukmato newe serê nê hîrê madeyanê bêro ronayene:

1. ''Hukmato ke yeno ronayene ganî vera sîyasetê hemkarîya dişmenî û îxanetî vejîyo.

2.Ganî vera îşxalê dewleta tirke vejîyo, îşxalî red bikero dişmenî herra xo ra vejo.

3. Rojhelatê Mîyanênî nika kaosî ra ravêreno. Statuyî do bibedilîyê. Semedê kurdan hem tehlukeyêko gird hem zî firsetêko gird vejîyeno werte. Semedê nê zî ganî yewîya neteweyî bêra caardene; hukmato ke do bêro ronayene ganî yewîya kurdan esas bigîro.''