Hemserekê Konseya Rayberdişî ya KCKyî Cemîl Bay  beşê diyînî yê bernameyê taybetî yê Stêrk TVyî de tedayê vera HDPyî, hêrişê PDKyî yê vera gerîlayan, polîtîkayê AKP yê vera cinîyan û xoverdayîşê zîndanan ercnayî.

Qiseykerdişê Bayikî ra qismêk wina yo:

''Omer Faruk Gergerlîoglu semedo ke şarî het de bi û vera zulm û îşkenceyî ame bîyo hedef. Gergerlîoglu wayîrê wijdan û exlaqî yo. Vera HDP dewa ameye akerdene, ê wazenê 700 kesan rê sîyaset qedexe bikerê. Çunke HDP têna partîya kurdan nê partîya şaran a. Îqtîdarê AKP-MHPyî seba ke komel pareçe bikerpp, teslîm bigêro û bigêro binê xizmetê xo xîret kenê. 

La HDPyî verê nê tedayan de milê xo çewt nêkerd. Înan vat ê do tradîsyonê xo yê sîyasî rê dewam bikerê. Şar zî wayîrê HDPyî vejîya. Wexto ke îqtîdar vera HDP û Gergerlîogluyî game eşte şar de hêrsêk bi pîl. Ma dî ke şar Newroze de wayîrê HDPyî vejîya.

HDPyî ra verî zî xeylêk partîyî qefilîyayî. La kurdan têkoşînê xo rê bi xurtî dewam kerd. HDP biqefilno zî nêqefilno zî îqtîdarê AKP-MHPyî hînî nêeşkeno îdare bikero, peynîya înan ameya. Xoverdayîşê Garê, 8ê Adare û Newroze na raştîye mojnaye.

Newroze de şar wayîrê Rayber Apo, gerîlayan, PKK û HDPyî vejîya. Vakur, Başûr, Rojhelat, Rojawan, Şingal, Mexmûr, Ewropa, Lavrio, Rûsya û xeylêk cayan de merdimî wina wayîrê ma û HDPyî vejîyayî. Ez nînan selam kena û sipas kena.

Derdê Erodganî qedînayîşê şîdetê vera cinîyan, demokrasî û azadî nîyo. Erdogan eqsê nînan keno.Erdoganî tewr peyên Garê de derbêka pîle werde, 8ê Adare de cinîyan vera ci hemleyêke kerde û Newroze de zî no bi pîlêr. 

Têgêrayîşê cinîyan îqtîdar teng keno. Coka seba ke verê têgêrayîşê cinîyan  bigêrê înan nêmeyê şewe de Peymana Îstanbulî wedarite. Ê wazenê newe ra cinîyan bikerê kole. Ma hetê cinîyan de yê xora. Cinîyî heqdar ê. Rayber Apoyî seba cinîyan felsefe û îdeolojîyêke afernayî. Coka cinîyî wayîrê ci vejîyenê. Erdogan û Bahçelî nêeşkenê cinîyan ser o bire bidê. Têna cinîyî eşkenê Peymana Îstanbulî ser o qisey bikerê.

Rayberîye Rojawan de kedêka pîle daye. Netîceya na kede û xebatanê ci de Şorişê Rojawanî ame kerdene. Bi taybetî cinîyanê Rojawanî şoriş de ca girewt. Seba ke Rayberîye seba înan xebitîya ewro Rojawan bi xurtî wayîrê ci vejîyeno. 

Şarê Rojawanî vîneno ke dewlete ha xîret kena têkilîya mabênê Rayberîye û cinîyan bibirna. Pêro dinya de cinî û ciwanî nê tewirî mojnenê. Cinî û ciwanî rayberê  têkoşînê demokrasî û azadî yê. 

Şarê ma Newroze de bi taybetî PDKyî ra yewîya neteweyîye waşte. La PDKyî Newroze de hêrişê warê Berdesorê (kampa gerîlayan) kerd. Embazanê ma seba ke şer nêqewimîyo cewab nêda hêrişî. PDKyî Newroze de pê teyarayanê dewleta tirke hêrişê kampa ma kerd. No vera ruhê Newroze yo.

Ma pabeyê nê hêrişî nêbî. Çunke mabênê ma PDKyî de dîyalogî estbî. Ma nêzanenê çira no hêriş qewimîya. Hem zî Newroze de. Cigêrayîşê ma dewam keno xora. Ma xîret kenê bizanê le hele hêriş merkezî yo yan zî bira fermandarêkî yo.

Zîndanan de tradîsyonê xoverdayîşî berdewam o. La ganî ma na bare nêerzê tena milê embazanê tepişteyan. Grevê vêşanîye yê 2018î de 9 embazê ma zîndanan de şehîd bîyî. Xoverdayîşê zîndanan ra dima dewlete tim seba pêvînayîşî destûr dana yanî xoverdayîşê embazan ser keweno. Tewr peyên pêvînayîşê telefonî dîya. Senî ke Rayber Apoyî ê û sîyasetê înan rexne kerdêne telefon birîya. Wa kadro û têgêrayîşê ma sey şarê ma seba azadîya Rayber Apoyî têkoşîn bikerê.

Şarê kurdî û PKK wayîrê çêran ê. Eke ma nêeşkê çêranê xo bipawê şansê ma yê ciwîyayîşî zî çin o. Hêzê têgêrayîşê ma milîtanîye ra yeno. KEs nêeşkeno verê milîtanîya ma bigêro.PKK û kurdî rêçê çêran ser o şinê û heta azadîye şorê. Kesê k hesabê şaşî kenê wa cade nê hesaban caverdê. Xoverdayîşê Garê de dîya ke no hêz bin nêkeweno.

Rojbîyayîşê Rayber Apoyî rojbîyayîşê ma pêroyînan o. Rojbîyayîşê Rayber Apoyî ganî bibo roja berzkerdişê têkoşînî. Rojbîyayîşê Rayberîye de ganî ma seba servistişê Hemleya 'Wextê Azadîye' têkoşîn bikerê.

Sebebê destbendkerdiş û veradayîşê keyeyê Şenyaşarî waştişê şiknayîşê îradeyê înan o. Keyeyê Dîlane Îzol ra zî 3 kesî kişîyayî. Reyna keyeyê wekîlêkê AKPyî no qirkerdiş kerd. Wekîlanê AKPyî keyeyê Şenyaşarî û Dîlane Îzol qetil kerd. Şexsê nînan de vera şarê kurdî sîyasetê çimternayîşî yeno kerdene.

Wa şarê ma, dostê ma, merdimê wayîrwijdanî dayîke Emîne Şenyaşar û Dîlane Îzol teyna nêverdê. Wayîrvejîyayîşê nê merdiman wayîrvejîyayîşê edaletî yo. Ez dayîke Emîne û Dîlane Îzol rê hûrmet û selamê xo erşawena. Ma heta peyêne hetê çalakîya înan a fîraze de yê. 

Ez Newroza şarê ma, gerîlayan, xoverdayîşê zîndanan û dostanê ma fîraz kena. Hewteyê Çêrîye yê gerîlayan fîraz kena. Destanê Garêr seba merdimîye bi rîpelêkê neweyî.  Ma reyna gerîlayanê Garê fîraz kenê.''