Hemserekê Konseya Rayberdişî ya KCKyî Cemîl Bayikî rojnameyê Hawlatî reyde qisey kerd û Têkoşînê Azadîye yê Kurdîstanî ercna.

Beşêkê qiseykerdişê Bayikî wina yo:

''Şarê dinya, kedkarî, cinîyî wayîrê Rayber Apoyî vejîyenê. No têna zêdîyayîşê tesîrê PKKyî, heman wextî de berzbîyayîşê qîmetê kurdan o û heman wextî de têkoşînê kurdan xurtêr keno. Şarê ma yê Başûrê Kurdîstanî paştî dano têkoşînê PKKyî.

Wayîrvejîyayîşê Şorişê Rojawanî yê xeta Rayber Apoyî û wayîrvejîyayîşê xoverdayîşê ci ney mojneno. Bi seyan ciwanî şîyî Rojawan ke şer bikerê û şehîd bîyî. Vera tecrîdê Rayber Apoyî têkoşîn kenê. Boykotkerdişê malanê Tirkîya paştdayîşêko zaf ercayîye yo.

Ma wazenê ke Şengal bibo xoser, hem Iraq hem zî Kurdîstano Federe ra bibo xoser. Eke Iraq û PDK vera ney bivejîyê nêheqîye kenê. Ganî partîyê sîyasîyî pêro goş bidê waştişanê êzidîyan. Sere de berpirsîyarîyêka sîyasîye, wijdanîye û exlaqîye yê PDKyî bi nê hewayî ya. Şarê Şengalî xoserîye wazeno.

Ganî şarê kurdî biwazo ke hêzê xerîbî erdê înan ra bivejîyê. Her çi ra verî ganî Tirkîya erdê kurdan ra bivejîya. Dewleta tirke dişmenê kurdan a. No hêzo dişmen Başûrê Kurdîstanî de bi desan baregehî awan kerdî. Xora şarê Başûrî zaf reyî çalakîyî kerdî û waşt ke leşkerê tirkî erdê înan ra bivejîyê. Şar do nê baregehan teqez werte ra bidê wedaritene. Heta ke nê baregehî bimanî şarê kurdî û Kurdîstan azad nêbenê. Armancê ma Kurdîstanêko azad o ke wesayetî ra dûrî yo. Estbîyayîşê hêzan ê îşxalkeran ê bi nê hawayî ganî têna îrade û bira sîyasîyî rê nêrê verdayene.

Amerîka Rojawan de ya çunke wazena ke awankerdişê Sûrîye de estba, Iraqî ser o bi xurtî tesîr bikera, tesîrê sîyasî yê kurdan bikera. Armancê Tirkîya yê Rojawanî zî no yo ke Tirkîya wazena ke statuyê sîyasî yê Rojawanî asteng bikera. Heta ke îradeyê şarî nêro caardene Sûrîye de aramîye nêna caardene. Sere de îradeyê kurdan. Bêguman estbîyayîşê hêzanê teberî seba kurdanê Rojawanî bitehlûke yê.

Şarê Rojawanî ganî hêzêkê xerîbî xo rê sey paştdayox nêvîno. Kurdî, erebî, sûryanî ganî giranîya xo bidê awankkerdişê Kurdîstanêkê xoserî û Sûrîyeya demokratîkî. Sûrîyeyêka demokratîke û Rojawanêko demokratîk do bibê Sûrîyeyêke ke tesîrê hêzanê xerîban aye ser o kêm ê.

Têkoşînê şarê ma yê Rojhelatê Kurdîstanî yê seba cuyêka demokratîke û azade meşrû û heqdar o. Ma wazenê Komara Îslamî ya Demokratîke biba û kurdî bibê wayîrê statuyêkê xoserî yê demokratîkî. Îran de eyaletê Kurdîstanî esto. Eke no eylatê temamîya Kurdîstanî bigêro mîyanê xo û gamê demokratîkî bêrê eştene meseleya kurdî mîyanê Yewîya Demokratîke ya Îranî de çareser bena.

Tecrîdê Rayber Apoyî têna meseleya PKKyî nê, meseleya şarê Kurdîstanî ya. Babeta Rayber Apoyî de ma nê mesajî danê pêro şarê kurdî; Rayber Apo seba azadîya kurdan, seba cuya demokratîk têkoşîn keno. Mezg û dilê ey seba şarê Kurdîstanî xebitîyenê. Zerrîya Rayber Apoyî de çar parçeyanê Kurdîstanî, şar, ciwanî û cinîyê Kurdîstanî estê. Naye ra wayîrvejîyayîşê Rayber Apoyî wayîrvejîyayîşê xo yo.''

Peynîya qiseykerdişê xo de Bayikî roşanê Newroze fîraz kerd.