Endamê Konseya Rayberdişî ya KCKyî Cemîl Bayik binşewe bi meymanê bernameyê taybetî yê Stêrk TVyî. Bayikî bername de xeylêk rojdemî ercnayî.

PKK çend şino pîlêr beno

Bayikî sere de hêzê ke engişta înan Komployê 15ê Sibate de esta şermezar kerdî û şehîdî yad kerdî. Bayikî vat: ''Pê nê komployî ame waştene ke şexsê Raybar Apoyî de têgêrayîşê kurdan bêro tasfîyekerdene û kurdî bêrê qirkerdene. Wexto ke Rayber Apo esîr ame girewtene her kesî vatêne 'temam hînî PKK qedîya'. Kesî bawer nêkerdêne ke PKK wîna beno pîl û sîyasetê Rojhilatê Mîyanênenî û dinya rê tesîr keno. Tayînan vatêne 6 mengî emrê PKKyî mendo la PKKyî bi pîlbîyayîşî rayîrê xo rê dewam kerd. Înan Rayber Apo, no têgêrayîş, felsefe û îdeolîya ci ya rêxistinkerdeye fehm nêkerd. Hêzanê komplokeran verî zî dinya de xeylêk komployî kerdî. Înan vatêne qey sey verî reyna netîce genê. Dima ra fehm kerd ke no têgêrayîş sey têgêrayîşanê verênan nîyo û ê nêeşkenê wina rehet netîce bigerê. Coka komplo bi rayîranê bînan danê domnayene.

Rayber Apo xoverdayîşo tarîxî dano

Rayber Apoyî zanayêne ke no komplo semedê kurdan û merdimîye yeno çi mana coka vera komployî sereberz vindert û berpirsîyarîya tarîxî girewte xo ser. Hetê fikirîyayîşî ra xo newe ra aferna. Eynî wext de têgêrayîş û şarê kurdî de zî newetîye aferna. Paradîgmaya newî aferna ke meseleyanê heme merdimîye çarçewa demokrasî de çareser kena. Rayber Apoyî pê nînan komplo pûç vet. No eynî wext de semedê PKK, şarê kurdî û merdimîye xizmeto ke gird bi. Rayber Apo hem xo hem zî têgêrayîş û şarê kurdî payre tepiştî û semedê merdimîye hêvîyêka newî afernaye. Seredê mîlîtanê nê têgêrayîşî, şarê kurdî û merdimî ganî nê xoverdayîşî hole fehm bikero. Îmraliyo ke sey tabuto de nê şertanê zehmetan de çew nêeşkeno wina xoverdayîşêk bido û hêvîyanê neweyan biaferno û têgêrayîşî pîl bikero. No mumkun nîyo. Seba ke Rayber Apo têgêrayîş, şar û merdimîye rê girêdayeyo Îmrali de xoverdayîşo tarîxî dano. No xoverdayîş berpirsîyarîya ma zî giranêr keno. Sey mîlîtananê PKKyî û şarê kurdî û êyê ke semedê demokrasî û azadîye xover danê ganî her kes berpirsîyarîya xo bîyaro ca.

Azadîya Rayber Apoyî azadîya şarê kurdî ya

Rayber Apoyî senî ke semedê şarê kurdî û merdimye zaf çî kerd eynî wext de semedê cinîyan ê kurdan û dinya zî bi hêvî. Dinya de qet kesî derheqê cinîyan de wina têkoşîn nêkerd. Têkoşînê azadîye yê cinîyan têna cinî koletîye ra nêxelisneno eynî wext de camêrd û komel zî keno azad. Coka mîlîtanê PKKyî, şarê kurdî û êyê ke xoverdayîşê sosyalîzmî û demokrasî danê, bitayetî zî cinî û ciwanî ganî xo Rayber Apoyî rê sey deyndar vînê û nê deynê xo bidê. Her kesî ra no yeno pawitene. Coka ma zî vanê Dem Demê Azadîye yo. Pê nê şîarî ma azadîya Rayber Apoyî kenê merkez. Azadîya Rayber Apoyî azadîya şarê kurdî ya. Nika Kurdîstanî ra heta her hetê dinya roşnvîr, nuştox û sendîkayî semedê azadî Rayber Apoyî xoverdayîşê muhîmî danê. No xoverdayîşo bimbareko ke têna semedê Rayber Apoyî ney merdimîye rê xizmet keno. Başûrê Kurdîstanî de zî şar, nuştox, roşnvîrî  tewrê kampanya benê la sîyasetmedar û rêxistinî zaf tewrê na kampanya nêbenê. Na nuqtayêka muhîm a. Şarê ma ganî nayî hole bizano.''

PKK semedê pawitişê kurdan têkoşîn keno

Bayîkî qiseykerdişê xo rê wina dewam kerd: ''Nika vera kurdan sîyasetê qikerdişî yeno rayraberdene. PKK serkêşîya Rayber Apoyî de vera nê sîyasetî vindeno. Înan dîye ke heta ke PKKyî tasfîye mekerê nêeşkenê vera kurdan ser bikewê. Coka sîstemêko newe ard ke sereyê ci de Erdogan, Bahçelî û Ergenekon esto. Nika Tirkîya de sîyasetê zereyî û teberî heme çarçewa çînkerdişê kurdan de yeno rayraberdene. Wazenê ke PKKyî tasfîye bikerê û kurdan qir bikerê. Têna Vakûr de ney heme leteyanê Kurdîstan de waştişê înan no yo. Heme kurdan hedef genê.  Tirkîya endama NATO ya û tekîlîya ci bi Yewîya Ewropa esta. Nê tekîlîyanê xo vera her kesî sey şantajî şuxulnena. Pîya bi nînan Şerê Dinya yê 3. zî esto. Wazenê ke wextê nê şerî de waştişê qirkerdişî bîyarê ca la PKK verê înan de asteng o. Coka bi heme hêzê xo kenê ke PKKyî tasfîye bikerê.

Ewro pratîk de Tirkîya û PDK komplo rayra benê

Senî ke yeno zanayene  komployê mîyanneteweyî Şam de dest pêkerd. Wazenê ke Iraq û Başûrê Kurdîstanî de bidê domnayene û netîce bigerê. Nameyê sey Hulusî Akar û Hakan Fîdanî ra heyetê Başûrê Kurdîstanî de  û Iraq de pêvînayîşî kerdî. Başûrê Kurdîstanî de Mesûd, Mesrûr û Nerçîrvan Barzanî reyde pêvînayîşî kerdî. Berpirsîyaranê PDKyî de pêvînayîşî ameyî kerdene. Kesê ke nê heyet de bî nameyê leşkerî û îstîxbaratî bî. No heyetêko sîyasî  û ekonomî nêbi. Eşkerayo ke amanc operasyono leşkerî yo. Tasfîyekerdişê PKKyî ra Iraq tiway dest nêfîneno. Coka vera Iraqî polîtîkyaya şantaj û tehdîtî yena rayraberdene. Hem Tirkîya hem zî PDK nayî keno. Iraq mîyanê de meseleyê giranî  û hetê ci yê zehîfî estê. Coka nêeşkenê vera înan vejîyê. Nika pratîk de Tirkîya û PDK komplo rayra benê.

PDK nika eşkera dişmenîye keno

PDKyî verî mîyan vera PKKyî vejîyayêne yan zî ci rê dişmenîye kerdêne û mîyan paştî dayêne dewleta tirke la nika eşkera dişmenîye keno. Heta nika mîyan kerd netîce nêgirewt. Coka mecbur mend ke eşkera bikero. Ê hînî teşhîr bîyî. Sîyasetê PDKyî xizmetê dewleta tirke keno. Qirkerdişê kurdan rê xizmet keno. Tirkîya seba ke semedê tasfîyekerdişê PKKyî hetkarîya PDKyî rê hewce ya hend nêşana ci ser. Tarîx de ma vînenê ke dewleta tirke tim tay kurdan ancena hetê xo û vera kurdan şuxulnena. Bado ke waştişê xo fînena dest hemkaran îmha kena. Zanê ke êyê ke şarê xo rê xayînîye kenê înan rê zî kenê. Ganî PDK tarîxî ra ders vejo û nê sîyasetê leyminî rê xizmet nêkero. Plano ke dewleta tirke wazena pîya bi PDKyî bikero têna PKKyî ney heme kurdan eleqedar keno. No semedê heme kurdan tehlukeyo. Na rewşêka zaf giran a. Ganî şarê kurdî nayî hole fehm bikero.

Statugirewtişê Başûrî de keda pîle ya PKKyî esta

Ewro PKK şeref û anorê şarê kurdî yo. PKK heme Kurdîstan de ruh û hêzê xoverdayîşî dano şarê kurdî. Hêrişê vera PKKyî hêrişê vera kurdan o. Kurdî ganî vajî ma senî verê nê sîyasetê leyminî genê û vera nê bigerê. Eke no plano leymin bêro caardene heme kurdî do zirar bivînê. Şarê kurdî firsendê azadîya tarîxî fînayo dest, wazenê verê nayî bigerê. Ma zanê şarê Başûrî vera nayî vejîyeno la ganî partîyê Başûrî zî vera PDKyî vejîyo PDK vano 'ma, statu û Başûrî nas nêkenê, pêşmergeyan kişenê' Nê heme îftîrayê. Êyê ke nayî vanê bi xo zanê ke statugirewtişê Başûrî de keda pîle ya PKKyî esta. Eke PKK çînêbîyêne Tirkîya selam zî kesî nêdayêne. Seba ke PKKyî ê fînayî tengayî ê wîna têgêrayî. Eke PKK çînêbo statuyê înan yew roje zî nêmaneno. PKK statuyî paweno, PDK statuyî fîneno tehluke. Pîya bi Tirkîya sîyasetê qirkerdişî rayrabenê. No peynîya kurdan ano û destkewteyanê kurdan çîn keno.

Ganî heme hêzê kurdan semedê azadîya şarê xo têbigêrê

Problemê ma bi pêşmergeyan çîn o.  Ma wazenê pîya bi Başûrî şarê xo rê xizmet bikerê û vera dişmenî bivejîyê. Firsendêko tarîxî vejîya verê kurdan. Ganî her kes semedê azadîya kurdan têbigêro. Bi nameyê têgêrayîşê ma ez soz dana şarê kurdî û şaranê dinya. Ma statu û hukmatê Başûrî û pêşmergeyan qebul kenê. Wa PDK zî soz bido ke ê do hînî Tirkîya rê ajanîye nêkerê. Wa sîyasetê qirkerdişî rê xizmet nêkerê. Wa ê zî sozê nayî bidê. Eke wina soz bidê tengayîye lez yenê çareserkerdene. Şarê ma ra waştişê ma zî oyo ke nayî ser vinderê. Wa no bêro zanayene ke kes nêeşkeno verê nê têgêrayîşî de vindero.  Qet kes nêeşkeno vajo xover medê. No têgêrayîş vera teslîmîyet û xayînîye vejîya do heta peynî zî têkoşînê nayî bido.

Bê xoverdayîşî yewna rayîrê kurdan çîn o

Badê pêvînayîşê PDK û heyetê Hulusî Akarî yeno vatene ke  do Tirkîya hêrişê Şingal, Dêrik û Herêmanê Pawitişî yê Medya bikero. Nayî ra yeno fehmkerdene ke tayînan sozê paştdayîşî dayo. Xora Eyn Îsa de çend mengî yo şer esto. Tirkîya wazena îşxal bikero û şarê Rojawanî vera nayî xover dano. Verî zî Efrîn, Serêkanîye û Girê Sipî ameyî îşxlakerdene. Nika nê cayan ra kurdan vejenê herinda înan de çeteyan ca kenê. Her kes zano ke wexto ke Tirkîya hêrişê nê cayanê îşxalkerdeyan kerd ENKSyî zî paştî daye înan hema zî paştî danê ci ke bajaranê bînan ê Rojawanî îşxal bikerê. Vanê qey eke şorişê Rojawanî bêro tasfîyekerdene ê ûca îdare kenê. Wîna xeyalen kenê. Tirîya çara paştî gena ke hêrişê Rojawan, Şingal û Herêmanê Pawitişî yê Medya kena? Tay hêzê kurdan paştî danê înan. Eke paştdayîşê înan çînêbo Tirkîya nêeşkena gamêke bierzo.  Tirkîya bi paştdayîşê PDK, ENKS, kurdanê ajanan û deweltanê mîyanneteweyî  hêrişê îşxalî kena.  Şarê ma ganî vera hêrişanê dewleta tirke her ca de amade bo. Bê xoverdayîşî yewna rayîrê kurdan çîn o.

Têkoşînê gerîlayan her kesî payra tepişeno

Gerîla nika xoverdayîşê qehremanîye rayra beno. Bi na wesîle ez înan zî fîraz kena. Şehîdanê ma bihurmet yad kena û sozê serkewtişî newe kena. Gerîla ruh dano şarê kurdî, şaranê Tirkîya û hêzanê demokrasîyî. Coka dewleta tirke bi heme hêzê xo yena gerîlayan ser. Nika heme barê têkoşînî milê gerîlayan de yo. Coka gerîla bedelanê pîlan dano. Tay vanê ganî hînî gerîlayî bedel medo. Eke wîna vanê wa berpirsîyarîya xo bîyarê ca. Prosesê pandemî de xeylêk hetan çalakîyî vindarnayî la gerîla nêvindert. Têkoşînê gerîlayan her kesî payra tepişeno.

HDP teslîm nêbeno, xover dano

HDP û hêzê demokrasî zî raştê hêrişî yenê. Eke HDP bêro tasfîyekerdene heme hetê demokrasî yenê tasfîyekerdene. HDP xover dano, verê zextê înan de milê xo çewt nêkeno. Seba ke HDP teslîm nêbeno ê zafêr şinê ser. Hêzê demokrasîyî yê Tirkîya zî paştî danê HDPyî. No zî hêrsê îqtîdarî ano. Wazenê HDPyî biqefilnê û wina vîjnayîş bikerê. Îqtîdarî semedê vergirewtişê şarê kurdî û hêzanê demokrasîyî pandemî sey firsendêk şuxulna. Wazenê muxaletî perçe bikerê û îqtîdarê xo rayra berê. Heme îqtîdarê tarîxê Tirkîya vera komelî ajanîye viste dewre û welat talan kerd. Nika îqtîdarê AKP-MHPyî teberê xo de her kesî sey sûcdar û xayîn vînenê. Coka her kesî tepişene. Tirkîya de qanûn çîn o.Tay hetî vanê ê vera îqtîdar ê la prtatîk de game nêerzene. Muxalefet wîna nêbeno. Heta ke hêzê demokrasîyî yê radîkalî merê têhet û pîya têkoşîn nêkerê Tirkîya de blogê demokrasî aver nêşino. Îqtîdaro faşîst têna bi têkoşînê hemparî eşkeno bêro wardayene. Hemleya ma yê Dem Demê Azadîye yo şarê kurdî û şaranê bînan ê dinya de ruhêk aferna la no qîm nêkeno. Ganî hemle bêro pîlkerdene.''